دەنەسىن بولشەكتەپ تاستاعان: پوليتسيا اياجان ەدىلوۆانىڭ ولىمىنە قاتىستى تۇسىنىك بەردى
بۇگىن الماتى قالالىق پوليتسيا دەپارتامەنتىنىڭ ارنايى بريفينگىندە وقيعانىڭ ءمان-جايى ايتىلدى، دەپ حابارلايدى قازاقپارات ءتىلشىسى.
الماتى قالالىق پوليتسيا دەپارتامەنتىنىڭ رەسمي وكىلى سالتانات ازىربەكتىڭ سوزىنشە، كۇدىكتى جاسىرىنعان پاتەردەن قايتىس بولعان ستۋدەنت قىزدىڭ دەنەسىنىڭ بولشەكتەرى تابىلعان.
«كۇدىكتىنى ۇستاۋ كەزىندە ول ءوز-وزىنە قول جۇمساماق بولىپ دەنەسىن جاراقاتتاعان. ءبىراق ونىڭ بۇل ارەكەتى ىسكە اسپادى. وقيعا ورنىنا دارىگەرلەر شاقىرتىلىپ، ۇستالعان ادام №7-اۋرۋحاناعا جەتكىزىلدى. ونى تاۋلىك بويى كۇزەتەدى. ايىققاننان كەيىن كۇدىكتى تەرگەۋ يزولياتورىنا اۋىستىرىلادى. كۇدىكتىنىڭ ايتۋىنشا، اياجان ەكەۋىنىڭ اراسىندا جانجال تۋىپ، سوسىن ول ونى ءولتىرىپ، قىلمىستىڭ ىزدەرىن جاسىرۋعا تىرىسقان. وسى ماقساتتى كۇدىكتى قىزدىڭ دەنەسىن بولشەكتەگەن. دەنە بولشەكتەرىن قالانىڭ ءار جەرىنە لاقتىرىپ ۇلگەرگەن. سوت وعان قاتىستى قاماۋعا الۋ تۇرىندەگى شارانى قابىلدادى. تەرگەۋ ءجۇرىپ جاتىر»، - دەدى سالتانات ازىربەك.
بۇعان دەيىن، الماتىدا ءىز-ءتۇزسىز جوعالعان 19 جاستاعى بويجەتكەننىڭ دەنەسى تابىلعانى تۋرالى حابارلاعان بولاتىنبىز. الماتى قالالىق پوليتسيا دەپارتامەنتى تاراتقان مالىمەتكە سايكەس، 20-ناۋرىز كۇنى قىزدىڭ اپكەسى پوليتسياعا جۇگىنىپ، ءسىڭلىسىنىڭ جوعالىپ كەتكەنىن حابارلاعان. بويجەتكەندى ىزدەۋ ءۇشىن ارنايى جەدەل تەرگەۋ توبى قۇرىلدى. ىزدەۋ جۇمىسى كەزىندە قىزدىڭ سول كۇنى الەۋمەتتىك جەلىدە تانىسقان جىگىتپەن كەزدەسۋدى جوسپارلاعانى انىقتالدى. كەيىن بەلگىلى بولعانداي، بويجەتكەن سول بەيتانىس جىگىتتىڭ قىلمىستىق ارەكەتىنەن قازا تاپقان. كۇدىكتى - 1993 -جىلى تۋعان تۇركىستان وبلىسىنىڭ تۇرعىنى.
اۆتور: الما مۇقانوۆا
