ۆان گوگتىڭ سۋرەتى رەكوردتى سوماعا ساتىلدى
كارتينانىڭ ساتىلىمى موديلياني، رودين، كاميللا كلودەل، دەگا، كلي جانە ماگريتت سياقتى سۋرەتشىلەردىڭ 33 تۋىندىسى قويىلعان اۋكسيوندى اياقتادى.
«ۆينسەنت ۆان گوگتىڭ عاسىرلار بويى جەكە كوللەكسيادا بولعان جانە وسى اپتادا العاش رەت كوپشىلىك نازارىنا ۇسىنىلعان «مونمارترداعى كوشە كورىنىسى» كارتيناسى پاريجدە 13091250 ەۋروعا ساتىلدى»، - دەپ حابارلاندى اۋكسيون ءۇيىنىڭ Twitter پاراقشاسىندا.
«مونمارترداعى كوشە كورىنىسىن» ۆان گوگ 1887 -جىلى پاريجدە اعاسى تەومەن بىرگە تۇرعان كەزدە سالعان. كارتينادا مونمارتردىڭ نىشاندارىنىڭ ءبىرى - مۋلەن دە لا گالەتتەگى جەل ديىرمەنى بەينەلەنگەن. بۇل جۇمىس 1920 -جىلدان باستاپ جەكە كوللەكسيادا ساقتالىپ كەلگەن.
«مونمارتر كەزەڭىندەگى ۆان گوگتىڭ سۋرەتتەرى الەمدەگى بەدەلدى مۇراجاي كوللەكسيالارىندا ەمەس، جەكە كوللەكسيالاردا ساقتالادى. وسىنداي اڭىزعا اينالعان تۋىندىنىڭ نارىققا شىعۋى وتە ماڭىزدى وقيعا»، - دەپ مالىمدەدى Sotheby's وكىلدەرى.
ايتا كەتۋ كەرەك، سۋرەتتىڭ الدىن الا باعاسى 5-8 ميلليون ەۋرونى قۇراعان.
اۆتور: گۇلزات اقجولوۆا
