تۇركىستاندا ۇشاتىن تەاتر اشىلادى - فوتو
قالاداعى قۇرىلىس الاڭدارىن ارالاعان وبلىس اكىمى ءومىرزاق شوكەيەۆ دەمالىس ورتالىعىنىڭ اشىلۋعا دايىندىق بارىسىمەن تانىستى. جوبا اۆتورلارىنىڭ ايتۋىنشا، قيال-عاجايىپ ورتالىق سامۇرىق قۇستىڭ جۇمىرتقاسى حالىق اڭىزىنا نەگىزدەلگەن. بايتەرەكتىڭ بۇتاعىنداعى ۇياسىنا كەلىپ، كيەلى سامۇرىق قۇس كۇن بەينەلى التىن جۇمىرتقا سالادى. ءدال وسى التىن ءتۇستى الىپ جۇمىرتقا كەلبەتىندەگى ەرەكشە تەاتردا بايتەرەگىمىز سياقتى سيقىرلى ەرتەگىلەر ەلىنە، قازاق حالقىنىڭ تاريحىنا جاڭا تەحنولوگيالاردىڭ كومەگىمەن، 8 D فورماتتا اسەرلى ساياحات جاساۋعا بولادى.
ەلىمىزدىڭ وتكەنى، بۇگىنگىسى مەن كەلەشەگىنىڭ كورىنىسى وسى تەاتر- مۋزەيدە كورسەتىلەدى. شىعىس ۇلگىسىندە سالىنعان كەشەن - كيەلى شاھارعا كەلەتىن مەيمانداردىڭ سۇيىكتى دەمالىس ورنىنا اينالارى ءسوزسىز.
تۇركىستان قالاسىنىڭ اكىمشىلىك ىسكەرلىك ورتالىعى (ا د س) اۋماعىندا اكىمشىلىك عيماراتتار مەن كوپقاباتتى 24 ءۇيدىڭ قاسبەتتەرىن ءبىر ۇلگىدە جارىقتاندىرۋ جۇمىستارى جۇرگىزىلۋدە. قالاداعى عيماراتتاردىڭ اينالاسى كوگالداندىرىلىپ، جارىقتاندىرىلۋدا.
قالانىڭ باستى كوشەلەرىنە تۇنگى جارىقتاندىرۋ جۇمىستارى جۇرگىزىلدى. سونداي-اق ياساۋي كەسەنەسىنىڭ الدىندا ەرەكشە جارىقشامدار ورناتىلدى. مينسكىدەن ارنايى الدىرىلعان اعاش كەيپىندەگى باقشا جارىقشامدارى تۇندە اينالانى سان الۋان تۇسكە بولەسە، كۇندىز سالقىن سۋ شاشىپ، اپتاپ ىستىقتان قورعايتىن بولادى.
وبلىس اكىمى ءومىرزاق شوكەيەۆ وسى قارقىندى جۇمىستاردىڭ بارىسىن باقىلاپ، جاۋاپتى تۇلعالارعا ناقتى تاپسىرمالار جۇكتەدى.
«دەندروساياباق» پەن «اتتراكسيوندار پاركى» اراسىندا جاڭا كوپىر سالۋ جوسپارلانۋدا. سونىمەن قاتار «جىبەك جولى» ساياباعى، ب. ساتتارحانوۆ بويىنداعى «جەلىلىك ساياباعى» اسەمدەلىپ، قوناق ۇيلەر جارىقتاندىرىلادى.
وبلىس باسشىسى ب. ساتتارحانوۆ داڭعىلىنداعى تۇرعىن ۇيلەردىڭ، كاسىپكەرلىك نىسانداردىڭ سىرتقى كەلبەتتەرىن جانە «رامىزدەر الاڭى» مەن «تۇركى باعىن» رەتكە كەلتىرۋ جۇمىستارىمەن تانىستى. بۇل جۇمىستار كاسىپكەرلەر مەن تۇرعىنداردىڭ كۇشتەرىمەن جۇرگىزىلىپ جاتىر.
