نۇر-سۇلتاندا قانداي جاعدايدا كارانتين تالاپتارى كۇشەيتىلەدى

نۇر-سۇلتان. قازاقپارات - نۇر-سۇلتان قالاسىنىڭ باس مەملەكەتتىك سانيتار دارىگەرى سارحات بەيسەنوۆا قانداي جاعدايدا كارانتين تالاپتارى كۇشەيتىلەتىنىن ءتۇسىندىردى، دەپ حابارلايدى قازاقپارات ءتىلشىسى.

«كارانتيندى كۇشەيتۋ ماسەلەسى قالاداعى جاعداي ناشارلاسا قاراستىرىلادى، قازىر بىزدە تۇراقتى تۇردە ك ۆ ي- مەن اۋىرۋدىڭ جوعارى كورسەتكىشى بار، ءبىراق ناشارلاۋ، ۋشىعۋ جوق. ەگەر جاعداي ناشارلاسا، ارينە ەكونوميكالىق نىساندارداعى بەلگىلى ءبىر شەكتەۋ ءىس- شارالارىن قاتاڭداتۋ جونىندە قاۋلى شىعارۋ قارالاتىن بولادى. بۇل ماسەلە قالاداعى ەپيدەميولوگيالىق احۋال ناشارلاعان كەزدە عانا قارالادى»، - دەپ جاۋاپ بەردى س. بەيسەنوۆا ەلوردا اكىمدىگىندە وتكەن ونلاين بريفينگتە.

بۇعان دەيىن نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ەلورداداعى ەپيدەميولوگيالىق جاعدايدى شىلدە ايىنداعى اۋىر كەزەڭگە تەڭەگەن ەدى. كوروناۆيرۋس ينفەكسياسى ناۋقاستارىنىڭ ءوسىمى ناۋرىز مەيرامىنان كەيىن بايقالدى. استانالىق دارىگەرلەر مەن بارلىق مەديتسينالىق قىزمەتكەرلەر قايتادان ەكى ەسە جۇكتەمەدە جۇمىس ىستەپ جاتىر. ك ۆ ي- مەن كۇرەسۋ ءۇشىن 11 ستاتسيونار ۇيىمداستىرىلدى، ونىڭ ىشىندە 10 ينفەكسيالىق، ءبىر كارانتيندىك ستاتسيونار («Ramada Plaza» قوناق ءۇيى بازاسىندا) بار. قوسىمشا ءۇش ۇيىمنىڭ بازاسىندا 300 ينفەكتسيالىق توسەك- ورىن اشىلۋى مۇمكىن.

اۆتور: ايجان سەرىكجان قىزى