اقپارات مينيسترلىگى جۋرناليست ستۋدەنتتەردىڭ پراكتيكادان وتۋىنە كوڭىل بولەدى
بۇل جايلى ق ر اقپارات جانە قوعامدىق دامۋ ۆيتسە-ءمينيسترى كەمەلبەك ويشىبايەۆ «قازاقستاننىڭ مەديا سالاسىن دامىتۋ» تاقىرىبىندا وتكەن كەڭەستە ايتتى.
ۆيتسە-ءمينيستردىڭ ايتۋىنشا، اقپارات مينيسترلىگى بىلتىر 2020-2021-جىلدارعا ارنالعان ادام كاپيتالىن دامىتۋ جونىندەگى باعدارلاما اياسىندا ارنايى جوسپارىن بەكىتكەن. وسى جوسپار بويىنشا مەدياسالادا جۇرگەن مامانداردىڭ بىلىگى مەن ءبىلىمىن كوتەرۋ ءىس-شارالارى جوسپارلانعان.
«بىلتىر پاندەمياعا بايلانىستى وقىتۋ كۋرستارى مەن شەبەرلىك سىنىپتارىنىڭ كوبى ونلاين فورماتتا ءوتتى. مۇنداي فورماتتىڭ وڭ، ءتيىمدى جاعى كوپ ەكەنىن اڭعاردىق. ماسەلەن بارىپ وقيتىن كۋرسقا قاراعاندا ونلاين كۋرسقا ەكى-ءۇش ەسە كوپ ادام قاتىساتىنى بايقالدى. تاعى ءبىر ءتيىمدى تۇسى، الىس ايماق پەن رەگيونالدى ولكەدەن كەلەتىن قاتىسۋشىلارعا كۋرسقا كوپ جەڭىلدىك بولعانى. ولار كەلىپ-كەتۋگە شىعىندالماي، قاجەت ءبىلىمدى قاشىقتان الدى»، - دەيدى كەمەلبەك ويشىبايەۆ.
ارنايى جوسپار شەڭبەرىندە بيىل دا مەديامامانداردىڭ ساۋاتى مەن ءبىلىمىن شىڭداۋ، بىلىگىن ارتتىرۋ بويىنشا شارالار جاسالماق. سولاردىڭ اراسىندا - جۋرناليستيكا ماماندىعىندا ءبىلىم الىپ جاتقان ستۋدەنت جاستاردىڭ پراكتيكادان وتۋىنە جاعداي جاساۋ. وسى ماقساتتا مەملەكەتتىك بۇقارالىق اقپارات قۇرالدارى ستۋدەنت جاستارعا جۋرناليستيكانىڭ تاعىلىمدامالىق، قولدانبالى قىر-سىرىن ۇيرەتۋگە مۇمكىندىكتەر ۇيىمداستىرماق.
«ماسەلەن، قازاقستان ۇلتتىق تەلەارناسىنىڭ «تاڭشولپان» باعدارلاماسىندا ستۋدەنتتەرگە ارنايى ايدار اشۋ جايلى ۇسىنىس بار. شاكىرتتەرگە ۆيدەوسيۋجەت جاساۋدىڭ جولدارى ۇيرەتىلەدى. ينتەرنەت باسىلىمدار مەن اقپاراتتىق رەسۋرستاردان دا پراكتيكادان وتكىزۋدىڭ جولدارىن قاراستىرىپ جاتىرمىز»، - دەيدى ۆيتسە-مينيستر.
ونىڭ ايتۋىنشا، ج و و- دا جۋرناليستيكا ماماندىعىن ءتامامداعان ستۋدەنتتەردىڭ 50 پايىزعا جۋىعى ماماندىعى بويىنشا جۇمىس ىستەمەيدى ەكەن. سوندىقتان وسىنداي شارالار بۇل كەمشىلىكتىڭ الدىن الۋعا باعىتتالماق.
«قازىر ستۋدەنتتەردىڭ مەدياساۋاتىن اشۋ ءۇشىن جوعارى وقۋ ورىندارىنا جۋرناليستيكا سالاسىندا جۇمىس ىستەگەن بىلىكتى مامانداردى شاقىرۋ ارقىلى ماستەر- كلاسس، ارنايى كۋرس وتكىزۋ بويىنشا جۇمىستار جۇرگىزىلىپ جاتىر. ولار دا ستۋدەنتتەرگە مەدياپراكتيكانى ۇيرەتىپ، جاستاردىڭ ءوزى وقىپ جاتقان سالانىڭ قىر-سىرىن مەڭگەرۋگە مۇمكىندىك بەرمەك»، - دەدى ويشىبايەۆ.
massaget.kz
