وزبەك نوكاۋتشى باتىر جۇكەمبايەۆپەن جەكپە- جەككە شىعۋدان باس تارتتى

نۇر-سۇلتان. قازاقپارات - ءبىرىنشى ورتا سالماقتاعى وزبەكستاندىق پروسپەكت شوحجاحون ەرگاشيەۆ (19-0، 17 ك و) قازاقستاندىق بوكسشى باتىر جۇكەمبايەۆپەن (18-0، 14 ك و) جەكپە-جەكتەن باس تارتىپتى، دەپ حابارلايدى Vesti.kz.

Boxingscene.com جانە Boxing News ينسايدەرى شون نامنىڭ مالىمەتىنشە، ەرگاشيەۆكە قازاق بوكسشىمەن ايقاس ءۇشىن 25 مىڭ دوللار ۇسىنىلعان ەكەن.

«ءبىرقاتار مالىمەت كوزى MTK Global شوحجاحون ەرگاشيەۆتىڭ كارەراسىمەن اينالىسا باستاعانىن حابارلادى. سوت قۇجاتتارى ونىڭ پروموۋتەرى دميتري ساليتا بوكسشىعا قارسى كەلىسىمشارتى بۇزۋ مەن بىلتىر رەسەيدە جۇدىرىقتاسقانى ءۇشىن ەكى ارىز تۇسىرگەنىن كورسەتىپ وتىر.

ول قۇجاتتار بويىنشا ەرگاشيەۆ Showtime ترانسلياتورىندا گەري انتۋان راسسەلمەن 50 مىڭ جانە باتىر دجۋكەمبايەۆپەن Ring City ترانسلياتورىندا 25 مىڭ دوللارعا جۇدىرىقتاسۋدان باس تارتقان. بۇل شاعىم بويىنشا ەرگاشيەۆ IBF رەيتينگىنەن دە شىعىپ قالۋى مۇمكىن»، - دەپ جازىپتى نام تۆيتتەر جەلىسىندە.