بايدەن مامىر ايىنا دەيىن ا ق ش- تىڭ بارلىق ەرەسەك تۇرعىندارىن ۆاكسينالاۋدى تاپسىردى
ەلدىڭ ۇكىمەتى جاعدايدى جاقسارتۋ ءۇشىن ۆاكسينا سالدىرۋداعى شەكتەۋلەردى بارىنشا جەڭىلدەتۋ قاجەت ەكەنىن ايتادى. وسى اپتادان باستاپ ا ق ش- تىڭ بىرنەشە شتاتىندا كوۆيد-19 ۆاكسيناسىن 16 جاسقا تولعان كەز كەلگەن ەرەسەك امەريكاندىق الا الادى. بۇل تىزىمگە بۇگىن تەحاس، ينديانا، جانە دجوردجيا شتاتتارى دا قوسىلدى.
ايتا كەتەيىك، 16-عا تولعاندارعا ازىرگە تەك Phfizer Biontech كومپانياسىنىڭ ەكپەسى عانا ەگىلەدى. ال Moderna جانە Johnson & Johnson ۆاكسينالارى بولسا تەك 18 جاسقا تولعاندارعا عانا رۇقسات. مامانداردىڭ ايتۋىنشا، كوۆيد ەكپەسىنىڭ بارىنشا قولجەتىمدى بولۋى ۆاكسينالاۋ ناۋقانىنىڭ قارقىنىن ارتتىرا تۇسەرى انىق.
ەستەرىڭىزگە سالايىق، ەل پرەزيدەنتى دجو بايدەن مامىردىڭ باسىنا دەيىن ا ق ش- تىڭ بارلىق شتاتىنداعى ەرەسەكتەردى ۆاكسينالاپ ۇلگەرۋ كەرەك دەپ مالىمدەدى.
دجو بايدەن، ا ق ش پرەزيدەنتى:
- اتقارىلعان جۇمىستاردىڭ ناتيجەسىندە بىزگە قاجەتتى ۆاكسينانىڭ قورىن قالىپتاستىرا بىلدىك. دەمەك مامىرعا دەيىن بارلىق ەرەسەك امەريكاندىق تەگىن ەكپە الۋى ءتيىس دەگەن ءسوز. كۇن سايىن ءوندىرىلىپ جاتقان ەكپەلەردى ءتيىستى مامانداردىڭ كومەگىمەن حالىققا جەتكىزىپ، سالدىرۋدى قولعا الدىق. وسى قارقىننان تايماي جۇمىس ىستەسەك، شىلدەنىڭ باسىنا دەيىن جاقىندارىمىزبەن باس قوسىپ، تاۋەلسىزدىك كۇنىن بارلىعىمىز بىرگە اتاپ وتە الامىز دەگەن ۇمىتتەمىن.
پرەزيدەنت بايدەننىڭ سوزىنە قاراماستان، كەيبىر شتاتتارداعى امەريكاندىقتار ۆاكسينا الۋعا اسىقپايدى. ءبىر عانا سولتۇستىك كارولينانىڭ وزىندە وتكەن اپتادا مىڭداعان حالىق ەكپە الۋدان باس تارتىپتى. ودان بولەك، كەيبىر شتاتتاردا ۆاكسينا سالاتىن مامانداردىڭ تاپشىلىعى بايقالۋدا. ۆاكسينانى قاجەتتى جەرلەرگە جەتكىزۋدەگى ولقىلىقتار تاعى بار.
بريۋس روبەستوۋ، دارىگەر:
- حالىققا ۆاكسينا الۋدىڭ ماڭىزدىلىعىن ءتۇسىندىرۋ ءۇشىن اۋقىمدى جۇمىس اتقارۋ كەرەك. مىسالى، ءبىزدىڭ قالامىزدا ۆاكسينا جەتكىلىكتى. ءبىراق سوعان قاراماستان حالىق ەكپە العىسى كەلمەيدى. تۇرعىنداردىڭ 20 پروتسەنتى عانا ۆاكسينالانعان. وتكەن اپتادا ەكپە الۋعا كەلگەندەردىڭ سانى وتە تومەن بولدى. ءبىر اپتاعا جوسپارلانعان ۆاكسينانىڭ تەك جارتىسىن عانا ەكتىك.
ا ق ش- تىڭ اۋرۋلاردى باقىلاۋ جانە الدىن الۋ ورتالىعىنىڭ مالىمەتى بويىنشا، كوۆيد ۆاكسيناسىنىڭ شىعارىلعان دوزاسى 170 ميلليونعا جۋىقتاعانىمەن، ەكپە العان امەريكاندىقتاردىڭ سانى 47 ميلليونعا دا جەتپەگەن. بۇل حالىقتىڭ 14 پروتسەنتى عانا. ال ورتاق يممۋنيتەتتى قالىپتاستىرۋ ءۇشىن امەريكاندىقتاردىڭ جوق دەگەندە 70-75 پروتسەنتى ۆاكسينالانۋى ءتيىس.
www.24.kz
