ۆاكسينا سالدىرعاننان كەيىن مونشاعا تۇسۋگە بولا ما - مامان جاۋابى

الماتى. قازاقپارات- الماتى قالاسى قوعامدىق دەنساۋلىق ساقتاۋ باسقارماسىنىڭ وكىلى، تەلەمەديسينا ديرەكتورى لاۋرا مىرزاعالي ونلاين بريفينگ بارىسىندا كوروناۆيرۋسقا قارسى ۆاكسينا سالدىرعاننان كەيىن قالاي كۇتىنۋ كەرەگىن ءتۇسىندىردى، دەپ حابارلايدى قازاقپارات ءتىلشىسى.

ونىڭ ايتۋىنشا، ۆاكسينا ءار ادامعا ءارتۇرلى اسەر ەتەدى.

«كوروناۆيرۋس ۆاكسيناسى ادامنىڭ اعزاسىنا قاراي رەاكسيا بەرەدى. بىرەۋدە جەڭىل، ەندى بىرەۋىندە اۋىر ءوتۋى مۇمكىن. مەن دە ۆاكسينا سالدىردىم. جەڭىل ءوتتى. تەك ورنى عانا اۋىردى. ال مەنىمەن بىرگە سالدىرعان ارىپتەستەرىمنىڭ كەيبىرەۋىنىڭ دەنە قىزۋى كوتەرىلدى، ەندى بىرىندە قالتىراۋ بولدى»، - دەيدى سپيكەر.

سونىمەن قاتار، ول ەكپەدەن كەيىن كۇتىنۋ كەرەكتىگىن باسا ايتتى.

«دەنە قىزۋى كوتەرىلسە، ونى تۇسىرۋگە كومەكتەسەتىن دارىلەر بولادى. ولار انتيبيوتيك ەمەس، دەنە قىزۋىن تۇسىرۋگە ارنالعان پاراتسەتامول، يبۋپروفەن سەكىلدى پرەپاراتتار. سولاردى ىشۋگە بولادى. مونشاعا بارىپ، سپورتپەن اينالىسۋعا دا رۇقسات. ءبىراق ءبىرىنشى كەزەكتە دەنە قىزۋىن ءتۇسىرۋ كەرەك. ودان كەيىن ۆاكسينا سالدىرعاننان كەيىن ءۇش كۇندەي مونشاعا تۇسۋگە، سۋ تيگىزۋگە بولمايدى. سول ءتارتىپتى ساقتاۋ قاجەت. ودان كەيىن ادامنىڭ جاعدايىنا قاراي شومىلۋعا بولادى. ءار نارسە ءوز ورنىمەن»، - دەيدى لاۋرا مىرزاعالي.

اۆتور: الما مۇقانوۆا