ءىرى جۇك كەمەسى سۋەتسك كانالىن بوگەپ تاستادى

كاير. قازاقپارات - مىسىردىڭ سۋەتسك كانالىندا ءىرى جۇك كەمەسى قايىرعا تۇرىپ قالىپ، الەمدەگى ەڭ ۇلكەن ساۋدا مارشرۋتىنىڭ جولىن بوگەپ تاستادى.

«قازاقپارات» ح ا ا بۇل تۋرالى BBC - گە سىلتەمە جاساپ حابارلايدى.

سەيسەنبى كۇنى سۋ سىيىمدىلىعى 200 مىڭ توننانى قۇرايتىن Ever Green اتاۋى بار اسا ۇلكەن كونتەينەر تاسىمالداۋشى سۋەتسك كانالىنىڭ تاياز اۋماعىندا تۇرىپ قالىپ، فارۆاتەردى تۇگەل بوگەپ تاستادى.

كانال بويىنشا قوزعالىس بۇعاتتالدى. كەمە قىتايدان نيدەرلاندىداعى روتتەردام پورتىنا بەت العان.

«كانالدىڭ وڭتۇستىك شەكاراسىنان شامامەن التى تەڭىز ميليا قاشىقتىقتا كەمە كەنەتتەن سوققان جەلدىڭ ەكپىنىنە تاپ بولعان. وسىدان كەمە العان بەتىنەن اۋىتقىپ، ابايسىزدا تايازدى جەرگە تۇرىپ قالعان»، - دەپ ءمالىم ەتتى Ever Green كومپانياسىنان.

سالدارىنان سۋەتسك كانالى اۋماعىنداعى قىزىل جانە جەرورتا تەڭىزىندە 100 دەن كوپ ءتۇرلى كەمەنىڭ كەپتەلىسى تۋىندادى. ر ب ك- نىڭ حابارلاۋىنشا، كەپتەلىستە 10 ميلليون باررەلدەن استام مۇنايى بار تانكەرلەر تۇر. ال Bloomberg- ءتىڭ جازۋىنشا، Ever Green كەمەسىن ورنىنا جىلجىتۋ ءۇشىن ەكى تاۋلىككە جۋىق ۋاقىت كەتەدى.

الايدا، وسى مەرزىمنىڭ ءوزى ەنەرگوتاسىمالداۋىشتاردى جەتكىزۋدە الەمدىك اۋقىمدا ىركىلىس تۋدىرۋ ءۇشىن جەتكىلىكتى بولىپ وتىر.

ۇزىندىعى 193 شاقىرىمدى (120 ميل) قۇرايتىن سۋەتسك كانالى الەمدەگى جۇكتەمەسى ەڭ كوپ سۋ جولدارىنىڭ ءبىرى. ول ارقىلى مۇناي تانكەرلەرى تاياۋ شىعىستان ەۋروپاعا جانە سولتۇستىك امەريكاعا مۇناي جەتكىزەدى.

كانالعا الەمدىك ساۋدانىڭ %12 جۋىعى جانە سۇيىتىلعان تابيعي گازدىڭ %8 تيەسىلى. سونداي-اق كۇن سايىن مۇندا ميلليون باررەلگە جۋىق مۇناي تاسىمالدانادى.