پاۆلوداردا كوشپەندىلەر ازىعىن دايىنداۋ تەحنولوگياسى جاڭعىرتىلىپ جاتىر

ۇلتتىق تاعامداردى ازىرلەۋدىڭ كونە ادىستەرىن قالىپقا كەلتىرۋ ءۇشىن الدىمەن عىلىمي تۇرعىدان شيكىزات قۇرامى ءجىتى تەكسەرىلەدى. سول ارقىلى قازاق حالقى مىڭداعان جىلدار بويى تۇتىنعان استىڭ قاسيەتى مەن ەرەكشەلىگى ايقىندالادى.

كوشپەندىلەر ازىعىنىڭ نەگىزگى كومپونەنتتەرى ەت پەن ءسۇت. عالىمدار قاۋىمى ءدال وسى ەكى شيكىزاتتىڭ نەگىزگى قاسيەتتەرىن زەرتتەيدى. بۇل زەرتحانادا ەتتىڭ مارمارلىگى انىقتالادى.

ۇلان تىلەۋبەك، وندىرىستىك وقۋ شەبەرى:

- ەتتىڭ مارمىرلىگى ءونىمنىڭ دامدىك قاسيەتتەرىن ايقىندايدى. ەكولوگيالىق تازا دا بولادى. اتا- بابالارىمىز وسىنداي ەتتى تۇتىنعان. ءونىم بۇگىنگى زامان تالاپتارىنا بەيىمدەلۋ كەرەك. سوندىقتان ءبىز ەت وندىرۋشىلەرگە عىلىمي تۇرعىدان كومەكتەسەمىز.

كوشپەندىلەر ازىعىن ازىرلەۋ تەحنولوگياسىن جاڭعىرتىپ، ونى وندىرىستىك دەڭگەيدە بەيىمدەۋ ماقساتىندا تەرەڭ زەرتتەۋلەر قاجەت. باستى تالاپ ءونىمنىڭ ساپاسى مەن ونىڭ قاۋىپسىزدىگىندە. ماسەلەن، بۇل زەرتحانادا ۇلتتىق تاعامداردىڭ قۇرامىندا كەزدەسەتىن ءسۇت شيكىزاتىنىڭ قاسيەتتەرى زەرتتەلەدى. بيىلعى جىلى ءوڭىردىڭ عالىمدارى تاۋار وندىرۋشىلەرمەن 10 ميلليون تەڭگەنىڭ كەلىسىم- شارتىنا قول قويعان.

ازات سادىققاليەۆ، كىشى عىلىمي قىزمەتكەر:

- ءسۇتتىڭ سىناماسىن الامىز. كەيىن ونىڭ قۇرامىن ساراپتايمىز. ماسەلەن، قىشقىلدىعى، قۇرامىنداعى سوماتيكالىق جاسۋشالار مەن وزگە دە پايدالى زاتتاردىڭ قۇرامى تەكسەرىلەدى. بۇل قۇرىلعى لوكتان 1.4 (ءبىر ءتورت) 700-مودەلى دەپ اتالادى. ونىڭ كومەگىمەن ءسۇتتىڭ مايلىلىعى مەن اقۋىزىن تەكسەرەمىز. بۇل كورسەتكىشتەر جوعارى بولسا، شارۋاشىلىقتار وندىرىلگەن ءونىم ءۇشىن سۋبسيديا الا الادى.

ۋنيۆەرسيتەتتە تاعام ونىمدەرىنىڭ تەحنولوگياسى بويىنشا عىلىمي مەكتەپ قالىپتاسقان. ونىڭ دامۋىنا ەۋرووداق تاراپىنان ۇيىمداستىرىلعان بايقاۋداعى جەڭىس تۇرتكى بولدى.

قۇرالاي يسايەۆا، تەحنيكا عىلىمدارىنىڭ كانديداتى:

- ەت پەن ءسۇت بولعاندا ول ءبىر- ەكى ءتۇرلى تاعام ەمەس. ويتكەنى شيكىزاتتىڭ تۇرلەرى ءارتۇرلى. مىسالى، بيە ءسۇتى، تۇيە ءسۇتى، ەشكى ءسۇتى قوي ءسۇتى دەپ بولىنسە، ەتتەر دە تۇلىككە قاراي بولىنەدى جانە ولاردى وڭدەۋ، ساقتاۋ تەحنولوگياسى ءارتۇرلى. سول تەحنولوگيالاردى ونەركاسىپكە ارناپ وزگەرتۋدەمىز.

ۇلتتىق تاعامداردىڭ نەگىزى بولاتىن اۋىل شارۋاشىلىعى ونىمدەرىن زەرتتەۋ ماقساتىندا اگرويننوۆاتسيا جانە بيوتەحنولوگيا عىلىمي ينستيتۋتى قۇرىلدى. وڭىردە شىعارىلاتىن ەت پەن سۇتكە كەشەندى زەرتتەۋلەر جۇرگىزىلەدى. كەيىن ۇلتتىق استى ازىرلەۋ مەن ساقتالۋ ادىستەرى جيناقتالماق.

www.24.kz