«تۇركىستان» تەلەارناسى ءۇش تىلدە حابار تاراتادى - ايدا بالايەۆا
ق ر اقپارات جانە قوعامدىق دامۋ ءمينيسترى ايدا بالايەۆا Facebook-تەگى پاراقشاسىندا وسىلاي جازدى، دەپ حابارلايدى قازاقپارات.
«بۇگىن «Turkistan» جاڭا تەلەارناسى ءوز جۇمىسىن باستادى. وزدەرىڭىز بىلەتىندەي، ەلباسىنىڭ تاپسىرماسىمەن تۇركىستاندا جاڭا زاماناۋي مەديا ورتالىق بوي كوتەردى، وعان ەلىمىزدىڭ تالانتتى ماماندارى جۇمىس جاساۋعا شاقىرىلدى. «Turkistan» تەلەارناسى كورەرمەندەردى قازاق، تۇرىك جانە ورىس تىلدەرىندە باۋىرلاس تۇركى حالىقتارىنىڭ تاريحىمەن، مادەنيەتىمەن جانە قازىرگى ومىرىمەن تانىستىرادى دەپ جوسپارلانۋدا. تەلەارنا ايماقتاعى مادەنيەتتىڭ دامۋىنا، وبلىستىڭ جەتىستىكتەرىن تەك قازاقستاندا عانا ەمەس، سونىمەن قاتار شەتەلدەردە تانىمال ەتۋگە وڭ اسەر ەتەدى»، - دەدى ايدا بالايەۆا.
ءمينيستردىڭ ايتۋىنشا، مۇنىڭ ءبارى قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ 2018 -جىلى تۇركىستان قالاسىن وبلىس ورتالىعى رەتىندە بەكىتۋ تۋرالى تاريحي شەشىمىنىڭ ارقاسىندا مۇمكىن بولىپ وتىر.
«وسى ساتتەن باستاپ قازاق حالقىنىڭ جانە تۇركى الەمىنىڭ رۋحاني بەسىگى بولىپ تابىلاتىن قالا جاڭا تاريحتىڭ ساناۋىن باستادى. «Turkistan» تەلەارناسى كورەرمەندەرىن مازمۇندى جانە قىزىقتى تەليەۆيزيالىق جوبالارمەن قۋانتا وتىرىپ، ايماقتىڭ جاڭا شەجىرەسىن زاماناۋي جانە جەدەل اقپاراتپەن جۇرگىزەتىنىنە سەنىمدىمىن»، - دەدى ول.
ەسكە سالا كەتسەك، ءاز-ناۋرىز مەيرامى قارساڭىندا بۇگىن تاڭعى 7-دەن باستاپ «Turkistan» تەلەارناسى «وتاۋ ت ۆ» ۇلتتىق سپۋتنيكتىك جەلىسى جانە كابەلدىك جەلىلەر ارقىلى قالىڭ كورەرمەنگە جول تارتتى.
