موينىنا جاراقات السا دا، قىلمىسكەردى ۇستادى: ش ق و-دا پوليتسەي ماراپاتتالدى
وسكەمەن. قازاقپارات - شىعىس قازاقستان وبلىسىندا پىشاق جاراقاتىن السا دا قىلمىسكەردى قولعا تۇسىرگەن پوليتسيا قىزمەتكەرىنە مەدال بەرىلدى، دەپ حابارلايدى قازاقپارات ءتىلشىسى.
ش ق و پوليتسيا دەپارتامەنتىنىڭ باستىعى ساعات ماديەۆ ناۋرىز مەيرامى قارساڭىندا وتكەن گارنيزوندىق جيىندا ق ر ىشكى ىستەر ءمينيسترىنىڭ اتىنان كەلگەن قۇتتىقتاۋ تەلەگرامماسىن وقىپ، زاڭدىلىق پەن قۇقىقتىق ءتارتىپ سالاسىندا ايانباي تەر توگىپ جۇرگەن ساقشىلارعا العىسىن جەتكىزدى. ءوز سوزىندە ول پوليتسەيلەردىڭ الداعى ۋاقىتتا دا وبلىس ازاماتتارىنىڭ قاۋىپسىزدىگىن ءتيىستى دەڭگەيدە قامتاماسىز ەتە وتىرىپ، قىزمەتتىك بورىشىن ۇلگىلى جانە جانقيارلىقپەن اتقاراتىنىنا سەنىم ءبىلدىردى.
«سونىمەن قاتار سالتاناتتى شارا بارىسىندا ەڭبەگى ەرەن پوليتسيا قىزمەتكەرلەرىنە قۇرمەت كورسەتىلدى. ش ق و پ د باستىعى نۇرجان كاكەيەۆ پەن بەكارىس ءابدولدانوۆقا «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالدارىن تابىس ەتتى»، - دەپ حابارلادى دەپارتامەنتتىڭ باسپا ءسوز قىزمەتىنەن.
ەستەرىڭىزگە سالا كەتسەك، 8-اقپانعا قاراعان ءتۇنى وسكەمەن قالالىق پوليتسيا باسقارماسىنىڭ پاترۋلدىك پوليتسەيلەرى كوپقاباتتى ۇيلەردىڭ بىرىندەگى تىنىشتىقتىڭ بۇزىلۋى تۋرالى شاقىرتۋ العان بولاتىن. وقيعا ورنىنا جەدەل جەتكەن پوليتسەيلەر ىشىمدىك ءىشىپ، قاتتى سويلەپ تۇرعان ەكى ەر ادامدى كوردى. نۇرجان كاكەيەۆ پەن بەكارىس ءابدولدانوۆ ولارعا ءتارتىپتى بۇزعاندارىن ءتۇسىندىرىپ، شۋ شىعارماۋدى وتىنگەن. وسى ۋاقىتتا ەر ادامنىڭ ءبىرى ن. كاكەيەۆتىڭ موينىن پىشاقپەن جارالاپ، قاشا جونەلدى. سوعان قاراماستان پوليتسيا قىزمەتكەرلەرى قۋعىنعا ءتۇسىپ، ءتارتىپ بۇزۋشىنى قولعا تۇسىرگەن.
