ءۇش وڭىردە جول جابىلدى

يندۋستريا جانە ينفراقۇرىلىمدىق دامۋ مينيسترلىگىنىڭ Telegram-كانالىندا جاريالانعان مالىمەت بويىنشا، بۇگىن ساعات 08.20-دەن باستاپ شىعىس قازاقستان وبلىسىندا اۋا رايىنىڭ ناشارلاۋىنا بايلانىستى رەسپبۋليكالىق ماڭىزداعى جولدا شەكتەۋ ەنگىزىلدى.

ناقتى ايتساق، الماتى- وسكەمەن باعىتىنداعى جولدىڭ 971-1048 شاقىرىم ارالىعىندا، ياعني ۇلان جانە قالباتاۋ اۋىلدارىنىڭ اراسىندا بۇرقاسىن مەن جولدىڭ كورىنبەۋىنە بايلانىستى بارلىق كولىك تۇرلەرىنە قوزعالىس شەكتەلدى.

«اقمولا وبلىسىنىڭ نۇر- سۇلتان- پەتروپاۆل باعىتىنداعى جولدىڭ 18-231 شاقىرىم ارالىعىندا، «قازاۆتوجول» ۇ ك- نىڭ اقىلى جول ديرەكسياسىنا جاتاتىن نۇر- سۇلتان- شۋچينسك بولىگىندە ساعات 09.10-دەن باستاپ بارلىق كولىك تۇرلەرىنىڭ جۇرۋىنە شەكتەۋ قويىلدى»، - دەپ جازىلعان حابارلامادا.

سونداي- اق، اقتوبە وبلىسىندا دا بۇرقاسىن كۇشەيىپ، جولدىڭ كورىنبەۋىنە بايلانىستى «اقتوبە- اتىراۋ- استراحان» اۆتوجولىندا قاندىاعاش- قاراۋىلكەلدى ۋچاسكەسىنىڭ 97-250 شاقىرىم ارالىعىندا بارلىق كولىك تۇرلەرىنىڭ قوزعالىسىنا شەكتەۋ قويىلىپ وتىر.

اۆتور: ەسىمجان ناقتىباي