سەمەيدەگى اتاۋى جوق داڭعىلعا نۇرسۇلتان نازاربايەۆ ەسىمى بەرىلەتىن بولدى

بۇگىن شاھار باسشىسى نۇرىمبەت ساقتاعانوۆتىڭ قاتىسۋىمەن قالالىق ءماسليحاتتىڭ كەزەكتەن تىس بەسىنشى سەسسياسى ءوتتى. وتىرىس بارىسىندا ءتورت ماسەلە قارالدى. العاشقى ۇشەۋى ۆەدومستۆوارالىق كوميسسيالاردىڭ قۇرامى جونىندە بولسا، ءتورتىنشىسى - قاراعايلى جاڭا ىقشاماۋدانىنداعى داڭعىلعا تۇڭعىش پرەزيدەنتتىڭ ەسىمىن بەرۋ جايلى بولعان.

داڭعىل قاراعايلى اۋدانىنداعى «سەمەي- پاۆلودار» تاسجولىنان باستاۋ الادى. سول جاعىندا كوپسالالى مادەني- سپورت كەشەنى، نازاربايەۆ زياتكەرلىك مەكتەبى، ال وڭ جاعىندا جاڭادان بوي كوتەرگەن تۇرعىن ۇيلەر مەن بالاباقشا ورنالاسقان.

«بولاشاقتا مۇز ايدىنى كەشەنىن، ءبىلىم جانە تەحنولوگيالار ترانسفەرى مەكتەبىن اشۋ جوسپارلانۋدا. سەرۋەندەۋ اۋماقتارى، قوعامدىق تاماقتانۋ ورىندارى، بالالارعا ارنالعان ويىن جانە سپورت الاڭدارى سالىنباق. بۇدان بولەك، وشەلەردى جارىقتاندىرۋ، ورىندىقتار، قوقىس جاشىكتەرىن جانە شاعىن ساۋلەت نىساندارىن ورناتۋ قاراستىرىلعان»، - دەدى سەمەي قالاسىنىڭ اكىمى نۇرىمبەت ساقتاعانوۆ.

- اتالعان داڭعىلدىڭ اتاۋى بەرىلمەگەن. سەسسيا بارىسىندا بارلىق ماسەلە بويىنشا شەشىمدەر ءبىراۋىزدان قابىلداندى. ەندى قاراعايلى كوشەسىنە اتاۋ بەرۋ تۋرالى تۇپكىلىكتى شەشىمدى رەسپۋبليكالىق ونوماستيكالىق كوميسسيا قابىلدايدى.

اۆتور: تالعاتجان مۇحامەتبەك ۇلى