جەر كاداسترىن اشۋ، ق ر ازاماتتىعىن الۋ تالاپتارىن كۇشەيتۋ كەرەك - مۇحتار تايجان

«ءبىز پرەزيدەنتتىڭ اۋىل شارۋاشىلىعى جەرلەرىن شەتەلدىكتەرگە ساتۋعا جانە جالعا بەرۋگە تىيىم سالۋ تۋرالى تاپسىرماسىن ورىنداۋىمىز كەرەك. ول ءۇشىن مەن زاڭدا بىلاي جازۋدى ۇسىنامىن: جەر ق ر رەزيدەنتتەرىنە، ياعني جەكە تۇلعالار مەن زاڭدى تۇلعالارعا بەرىلەدى. قۇرىلتايشىلار مەن قاتىسۋشىلار قۇرامىندا دا جەكە تۇلعالار ق ر ازاماتتارى بولۋى كەرەك. بۇل ۇسىنىستى ايتقان سەبەبىم، كەز كەلگەن نوتاريۋس قانداي دا ءبىر ج ش س قۇرامىنداعى جەكە تۇلعالاردىڭ ق ر ازاماتتارى ەكەنىن كورگەندە، مامىلەلەردى راسىمدەۋ وڭاي بولادى. ال ج ش س مەن زاڭدى تۇلعالاردى تەكسەرۋ مۇمكىن ەمەس، ولاردىڭ قۇرامىنداعى شەتەلدىكتەردىڭ ۇلەسى بار ما، جوق پا؟»، - دەدى م. تايجان ماجىلىستە زاڭ جوباسى جۇمىس توبىنىڭ وتىرىسىندا.

ونىڭ ايتۋىنشا، شەتەلدىكتەرگە، شەتەلدىك زاڭدى تۇلعالارعا جەردى ساتۋعا جانە جالعا بەرۋگە تىيىم سالۋ ءۇشىن جەر كاداسترىن اشۋ قاجەت.

«جەر كاداسترىن اشپاساق، بۇل ماقساتقا قول جەتكىزە المايمىز. ياعني، مەملەكەت مەنشىگى بولىپ سانالاتىن اۋىل شارۋاشىلىعى جەرلەرىن كىم جالداپ وتىرعانىن كورۋىمىز كەرەك. بۇل اقپاراتتار اشىق بولۋعا ءتيىس جانە «جەكە دەرەكتەر تۋرالى» زاڭ ەش بۇزىلمايدى، سەبەبى اۋىل شارۋاشىلىعى جەرلەرىنىڭ 99 پايىزدان استامى - مەملەكەت مەنشىگى. جالعا الۋشىلاردىڭ اتى نەمەسە زاڭدى تۇلعالار اتاۋى اشىق بولا الادى»، - دەدى م. تايجان.

سونىمەن بىرگە، سپيكەر قازاقستان ازاماتتىعىن الۋ تالاپتارىن كۇشەيتۋدى ۇسىندى. «الەمدىك تاجىريبەگە سۇيەنەتىن بولساق، قانداي دا ءبىر ەلدىڭ ازاماتتىعىن الۋ ءۇشىن ادامدار ەڭ كەمى 5 جىل تۇرۋى كەرەك، سول ەلدىڭ ءتىلى مەن تاريحى بويىنشا سىناق تاپسىرۋى كەرەك. ياعني، وسى ەلگە نيەتتەستىگىن ءبىلدىرۋى كەرەك جانە ەل ىشىندە زاڭبۇزۋشىلىقتار جاساماۋى كەرەك»، - دەدى مۇحتار تايجان.

بۇعان دەيىن وتىرىستا ق ر اۋىل شارۋاشىلىعى ۆيتسە- ءمينيسترى رۇستەم قۇرمانوۆ قانداستار جەردى قانداي ماقساتتا الا الاتىنىن تۇسىندىرگەن ەدى.

اۆتور: ايجان سەرىكجان قىزى