ق ر پرەزيدەنتى: الماتى تۇرعىندارىنىڭ تابىسىن ارتتىرۋ باستى نازاردا بولۋى ءتيىس
بۇل تۋرالى مەملەكەت باسشىسى بۇگىن الماتى قالاسىن ودان ءارى دامىتۋ ماسەلەلەرى جونىندە كەڭەس بارىسىندا ايتتى، دەپ حابارلايدى قازاقپارات.
جيىندى اشقان قازاقستان پرەزيدەنتى ەل تاۋەلسىزدىگىنىڭ 30 جىل ىشىندەگى تابىستارى الماتى قالاسىمەن تىعىز بايلانىستى ەكەنىن اتاپ ءوتتى.
- تاۋەلسىزدىگىمىز الماتىدا جاريالاندى. سوندىقتان الماتىنىڭ تاريحي ءرولى ايرىقشا. قازىر الماتى - ەكونوميكامىزدىڭ باستى قوزعاۋشى كۇشى. سونىمەن بىرگە مۇندا بيزنەس سالاسى جاقسى دامىعان، - دەدى پرەزيدەنت.
قاسىم-جومارت توقايەۆ حالىقتىڭ تۇرمىس ساپاسىن جاقسارتۋ بارشاعا ورتاق نەگىزگى مىندەت سانالاتىنىن جانە ازاماتتاردى جۇمىسپەن قامتىپ، تابىسىن ارتتىرۋ باستى نازاردا بولۋى قاجەت ەكەنىن ەسكە سالدى.
پرەزيدەنت قالانىڭ ۇزاق مەرزىمگە ارنالعان دامۋ ستراتەگياسىنا سايكەس، الماتى ءومىر سۇرۋگە قولايلى جانە جالپىعا بىردەي تەڭ مۇمكىندىك بەرەتىن قالاعا اينالۋعا ءتيىس ەكەنىنە توقتالدى.
مەملەكەت باسشىسى وسى ماقساتقا جەتۋ ءۇشىن ءبىرقاتار مىندەت جۇكتەدى.
