الماتىنىڭ كىرەبەرىسىندەگى جاڭا ەكولوگيالىق بەكەت جۇمىسىن باستادى
جاڭارتىلعان ەكوپوستتاردا كوپ كومپونەنتتى گازاناليزاتورلار قولدانىلادى. سول ارقىلى بەنزين جانە گازبەن جۇرەتىن كولىكتەردەن شىعاتىن زياندى زاتتاردى ولشەيدى. ياعني، كومىرسۋتەكتەر، كومىرتەك توتىعى، كومىرقىشقىل گازى، ازوت وكسيدتەرى تەكسەرىلەدى. ديزەلمەن جۇرەتىن كولىكتەر دە نازاردان تىس قالمايدى.
«قۇلجا تاس جولىنداعى ەكولوگيالىق بەكەتتىڭ جۇمىس ىستەپ تۇرعانىنا 10 جىلداي ۋاقىت بولدى. وسى ۋاقىت ارالىعىندا ول ەسكىردى. سوندىقتان ونى قايتا قالپىنا كەلتىردىك. گازداردى ولشەۋگە ارنالعان قوندىرعىسى بار جاڭا مودۋلدىك عيمارات ورناتىلدى. جاڭارتىلعان ەكوپوست قاراشا ايىنان باستاپ تەستىلىك رەجيمدە جۇمىس ىستەي باستادى. جاقىن ارادا تاعى وسىنداي 17 ەكوپوست پايدا بولادى. جەر ۋچاسكەسى ءبولىندى. ەكى اپتا سايىن ءبىر ەكوپوست ىسكە قوسىلادى. بىلتىر اۋا ساپاسىن باقىلاۋعا ارنالعان 10 اۆتوماتتى ستانسيا ورناتتىق. ستانسيالار اتموسفەراداعى لاستاۋشى زاتتاردىڭ كولەمىن، سونداي- اق ىلعالدىلىق، تەمپەراتۋرا، قىسىم، جەل باعىتى مەن جىلدامدىعىن ولشەيدى»، - دەدى الماتى قالالىق جاسىل ەكونوميكا باسقارماسى باستىعىنىڭ ورىنباسارى ايدىن تەمەشيەۆ.
ەكوپوستاردا كولىكتەردەن شىعاتىن زياندى زاتتاردى ولشەۋگە ارنايى وقىتىلعان 60 - تان استام مامان جۇمىلدىرىلادى. 19 ەكوپوستتىڭ ءارقايسىسى ءۇشىن جوسپار قۇرىلدى، وعان سايكەس كۇنىنە 500-دەن استام كولىك تەكسەرىلۋى كەرەك.
«جاڭارتىلعان ەكوپوست جۇمىسىن كەشە باستادى. ءبىر تاۋلىكتە 48 كولىك توقتاتىلدى. ونىڭ ىشىندە جەتى اۆتوكولىك يەسىنە حاتتاما تولتىرىلدى. اكىمشىلىك ايىپپۇل 434-باپ بويىنشا سالىنادى. ءبىرىنشى رەت ەسكەرتۋ رەتىندە 2 ا ە ك ايىپپۇل سالىنادى، ەگەر كولىك قۇرالى ەكىنشى رەت توقتاتىلسا، وندا 5 اەك، ال ەگەر ول ءۇشىنشى رەت قايتالانسا، اۆتوكولىك يەسى 10 اەك كولەمىندە ايىپپۇل تولەۋى كەرەك. سوندىقتان، ەسكەرتۋ العاننان كەيىن اۆتوكولىك يەسى ماشيناسىن مەملەكەتتىك ستاندارتقا جانە زەرتحانالىق تەكسەرۋدەن وتكىزۋ قاجەت»، - دەپ قوستى الماتى قالالىق جەرگىلىكتى پوليتسيا قىزمەتى باستىعىنىڭ ورىنباسارى ەرجان ۇزابايەۆ.
اۆتور: الما مۇقانوۆا
