كوروناۆيرۋس ناۋقاستارى ارتقان قاراعاندى وبلىسىندا تۇرعىندارعا ۇندەۋ جاسالدى

قاراعاندى. قازاقپارات - قاراعاندى وبلىسى اكىمىنىڭ دەنساۋلىق ساقتاۋ جونىندەگى شتاتتان تىس كەڭەسشىسى ەرجان نۇرلىبايەۆ ءوڭىر تۇرعىندارىنا ۇندەۋ جولدادى.

ول ايماقتا ك ۆ ي جاعدايلارى ارتىپ وتىرعانىن حابارلادى. ءبىر اپتا ىشىندە دەرتتى جۇقتىرۋ 157 ادامعا كوبەيگەن. بۇل نەگىزىنەن 18 جاستان 60 جاسقا دەيىنگى ادامدار، ولاردىڭ %65 ىندەتتىڭ بەلگىلەرى بار.

ەپيدجاعدايدى تالداۋ ينفەكسيانىڭ نەگىزگى دوناتورلارى ءۇي وشاقتارى بولىپ تابىلاتىنىن كورسەتەدى. ينفەكسيانىڭ تارالۋىن بولدىرماۋ ءۇشىن پاتسيەنتتەردى اۋرۋحاناعا جاتقىزۋ كورسەتكىشتەرى كەڭەيتىلدى. بارلىق ناۋقاستار، ءتىپتى ينفەكتسيانى وڭاي وتكەرەتىندەر دە تاۋلىك بويى باقىلاۋعا جىبەرىلەدى.

«بۇگىنگى تاڭدا ستاتسيونارلاردا 600 پاتسيەنت ەم الۋدا. ءبىز بۇرىن كونسەرۆاتسيالانعان ستاتسيونارلاردى قاتارعا ەنگىزە وتىرىپ، اۋىرلىعى ءارتۇرلى دارەجەدەگى ك ۆ ي بار ناۋقاستاردى ەمدەۋ ءۇشىن توسەك قورىن ۇلعايتۋ بويىنشا شارالار قابىلدايمىز. وسى اپتادا كاسىپتىك اۋرۋلار ينستيتۋتىنىڭ عيماراتىندا مەدۋنيۆەرسيتەتتىڭ گوسپيتالى اشىلادى. سودان كەيىن پاتسيەنتتەردى وحوتسكايا كوشەسىندەگى ينفەكتسيالىق ستاتسيونار دا قابىلداي باستايدى»، - دەدى ەرجان نۇرلىبايەۆ.

سونداي-اق، شتاتتان تىس كەڭەسشى وڭىردە ۆاكسيناتسيا جالعاسىپ جاتقانىن ەسكە سالدى. 6 مىڭ مەديتسينا قىزمەتكەرى، مىڭنان استام پەداگوگ، ت ج قىزمەتىنىڭ 300 قىزمەتكەرى ەكپە الدى. تۇرعىنداردى ەرىكتى ۆاكسينالاۋ دا باستالدى. قازىردىڭ وزىندە 200 دەن استام ادام ەگىلدى. ءبىرىنشى ساۋىردە وبلىسقا «سپۋتنيك V» ۆاكتسيناسىنىڭ جاڭا پارتياسى كەلەدى. ول اۋىلدىق جەرلەرگە باعىتتالادى.

«قۇرمەتتى وبلىس تۇرعىندارى! الدا ءبىزدى ۇزاق مەرەكەلەر كۇتىپ تۇر. وسىعان بايلانىستى ءبىز سىزدەردەن وتباسىلىق مەرەكەلەر مەن قوناققا بارۋدان باس تارتۋدى سۇرايمىز. ادامدار كوپ جينالاتىن جەرلەرگە بارۋدان اۋلاق بولىڭىزدار، قوعامدىق كولىكتە ماسكا كيىڭىزدەر. ءوز دەنساۋلىعىڭىزدى قورعاڭىزدار!» - دەپ ەرجان نۇرلىبايەۆ حالىققا ۇندەۋ جولدادى.