ءىز-ءتۇزسىز جوعالعان ەر ادامدى قارىزىن قايتارعىسى كەلمەگەن تانىسى ولتىرگەن

سايرام. قازاقپارات - تۇركىستان وبلىسىندا ءىز-ءتۇزسىز جوعالعان ازاماتتى قارىزىن قايتارعىسى كەلمەگەن تانىسىن ولتىرگەنى انىقتالدى.

قازاقپارات بۇل تۋرالى وڭىرلىك پوليتسيا دەپارتامەنتىنە سىلتەمە جاساپ حابارلايدى.

14-ناۋرىز كۇنى تۇنگى ساعات 23:00 شاماسىندا تۇركىستان وبلىسى سايرام اۋداندىق پوليتسيا باسقارماسىنا جەرگىلىكتى ايەل تۇرعىن كۇيەۋىنىڭ ءىز-ءتۇزسىز جوعالعانى تۋرالى حابارلاعان. سايرامدىق ساقشىلار جوعالعان ازاماتتى ىزدەۋگە بىردەن كىرىسكەن. جان-جاققا باعىتتامالار بەرىلىپ، اۋداندىق پوليتسيا باسقارماسىنىڭ جەكە قۇرامى جۇمىلدىرىلدى. اۋدانداعى تاكسي جۇرگىزۋشىلەرىنەن جانە كورۋى مۇمكىن دەگەن تۇرعىنداردان سۇراق-جاۋاپ الىندى. اتقارىلعان اۋقىمدى جۇمىستىڭ ناتيجەسىندە اۋدان پوليتسەيلەرى كۇدىكتىنىڭ ىزىنە تۇسكەن. ول جوعالعان ازاماتتىڭ تانىسى، سايرام اۋدانى، قارامۇرت اۋىلىنىڭ تۇرعىنى. كۇدىكتى ءوز كىناسىن مويىنداماي، جاۋاپتان جالتارۋعا تىرىسقان.

«الايدا پوليتسەيلەر دالەلدەر مەن ايعاقتى زاتتاردى جيناقتاپ، جوعالعان ازامات ءوزىنىڭ «ب م ۆ» كولىگىن تاستاپ، تەك وسى كۇدىكتىمەن جولىققانىن جانە كۇدىكتىنىڭ كولىگىنە وتىرىپ كەتكەنىن تولىعىمەن دالەلدەدى. وسىدان سوڭ كۇدىكتى ءوز كىناسىن تولىق مويىندادى»، - دەدى پوليتسيادان.

تەكسەرۋ بارىسىندا بەلگىلى بولعانداي، جوعالعان ازامات ءوز تانىسىنان ءىرى كولەمدەگى اقشاسىن الۋ ءۇشىن جولىققان. كۇدىكتىنىڭ كولىگىنە وتىرىپ، جولدا كەتىپ بارا جاتقاندا ەكەۋىنىڭ اراسىندا داۋ-جانجال تۋىنداعان. سالدارىنان قارىزدى قايتارعىسى كەلمەگەن كۇدىكتى ەر ازاماتتى بۋىندىرىپ ولتىرگەن. قىلمىس ءىزىن جاسىرۋ ماقساتىندا دەنەسىن كارەردىڭ ماڭىنا كومىپ تاستاعان.

«كۇدىكتى ەر ازامات قاماۋدا. ول بۇرىن سوتتى بولماعان. وعان قاتىستى ق ر ق ك-نىڭ 99-بابى 1-بولىگىمەن («ادام ءولتىرۋ») سوتقا دەيىنگى تەرگەپ-تەكسەرۋ جۇمىستارى جۇرگىزىلۋدە. ءىستىڭ تولىق ءمان- جايى تەرگەۋ بارىسىندا انىقتالاتىن بولادى»، - دەپ تولىقتىردى پوليتسيادان.