اقمولا وبلىسىندا «جىگىت سۇلتانى» بايقاۋىنىڭ جەڭىمپازدارى انىقتالدى

كوكشەتاۋ. قازاقپارات - اقمولا وبلىسىندا «جىگىت سۇلتانى» بايقاۋىنىڭ وبلىستىق كەزەڭى ءوتىپ، ۇزدىكتەرى ماراپاتتالدى، دەپ حابارلايدى قازاقپارات ءتىلشىسى وبلىستىق مادەنيەت، ارحيۆتەر جانە قۇجاتتامالار باسقارماسىنىڭ باسپا ءسوز قىزمەتىنە سىلتەمە جاساپ.

ق ر تاۋەلسىزدىگىنىڭ 30 جىلدىعىن مەرەكەلەۋ شەڭبەرىندە اقمولا وبلىستىق مادەنيەت، ارحيۆتەر جانە قۇجاتتامالار باسقارماسىنىڭ قولداۋىمەن وبلىستىق حالىق شىعارماشىلىق جانە مادەني دەمالىس ورتالىعى، كوكشەتاۋ قالاسىنىڭ سپورت جانە دەنە شىنىقتىرۋ ءبولىمى تاراپىنان ۇيىمداستىرىلعان بايقاۋعا وبلىستىڭ 11 اۋدانى مەن كوكشەتاۋ جانە ستەپنوگورسك قالاسىنان 20-29 جاس ارالىعىنداعى 12 جىگىت قاتىستى.

«بايقاۋدىڭ ماقساتى - جاستاردىڭ بويىندا وتانىنا دەگەن سۇيىسپەنشىلىك سەزىمىن قالىپتاستىرۋ، ۇلتتىق تاربيە قۇندىلىقتارىن ناسيحاتتاۋ، سالت- داستۇرلەردى ساقتاۋ، ۇلتتىق سپورت ويىندارىن دارىپتەۋ»، - دەيدى باسقارمانىڭ باسپا ءسوز قىزمەتىندەگىلەر.

بايقاۋعا وبلىستىق ادەبيەت جانە ونەر مۋزەيىنىڭ ديرەكتورى، حالىقارالىق «جىگىت سۇلتانى» بايقاۋىنىڭ جۇلدەگەرى - نۇربەك نۇرالين، اقمولا وبلىسى ىشكى ساياسات باسقارماسىنىڭ «اقمولا وبلىسىنىڭ «رۋحاني جاڭعىرۋ» وڭىرلىك جوبالاۋ كەڭسەسىنىڭ باسشىسى - مارال جاقىپوۆا، كوكشەتاۋ قالاسى اكىمدىگىنىڭ جانىنداعى دەنە شىنىقتىرۋ جانە سپورت ءبولىمىنىڭ باسشىسى- ءۋاليحان گالييەۆ، وبلىستىق حالىق شىعارماشىلىق جانە مادەني دەمالىس ورتالىعىنىڭ ءبولىم باسشىسى، رەسپۋبليكالىق «جىگىت سۇلتانى» بايقاۋىنىڭ جۇلدەگەرى - اسىلبەك ابەنوۆ، قازاقستان جازۋشىلار وداعى اقمولا وبلىستىق فيليالىنىڭ ءتوراعاسى، «سەرپەر»، «دارىن» مەملەكەتتىك جاستار سىيلىقتارىنىڭ يەگەرى، «شابىت» حالىقارالىق فەستيۆالىنىڭ گران- پري يەگەرى - الماس تەمىرباي بايقاۋعا تورەلىك ەتتى.

بايقاۋ ەكى كەزەڭمەن وتكىزىلدى. ءبىرىنشى كۇنى قاتىسۋشىلار كراسنويار سەلوسىنداعى يپپودرومدا وتكەن «العىر جىگىت» (جامبى اتۋ، اۋدارىسپاق) جانە «بىلەكتى جىگىت» (كىر تاسىن كوتەرۋ، ارمرەستلينگ) سايىستارىندا ەپتىلىكتەرى مەن شەبەرلىكتەرىن كورسەتىپ، كۇش سىناستى. ال «كوكشەتاۋ» مادەنيەت سارايىنىڭ ساحناسىندا وتكەن ەكىنشى كەزەڭدە قاتىسۋشىلار وزدەرىن تانىستىرىپ، «بىلىكتى جىگىت» سايىسىندا سالت- داستۇرگە قاتىستى سۇراقتارعا جاۋاپ بەردى. «سەگىز قىرلى، ءبىر سىرلى» سايىسىندا ونەرلەرىن ورتاعا سالدى. بايقاۋ قورىتىندىسى بويىنشا «جىگىت سۇلتانى» باس جۇلدەسىنە ماناربەك امانكەلدى (كراسنويار اۋىلى) لايىق دەپ تانىلدى. «بىلەكتى جىگىت» اتالىمىندا - سايات ءجۇزجاساروۆ (ساندىقتاۋ اۋدانى)، «ونەرلى جىگىت» اتالىمىندا - اقىلداس سەماتاي (زەرەندى اۋدانى)، «بىلىكتى جىگىت» اتالىمىندا - تورەجان بەيسەمبايەۆ (قورعالجىن اۋدانى)، «العىر جىگىت» اتالىمىندا - ناۋرىزباي ءابدىباي (ەگىندىكول اۋدانى) جەڭىمپاز اتاندى.

بايقاۋ جەڭىمپازدارى ۇيىمداستىرۋ القاسىنىڭ باعالى سىيلىقتارىمەن جانە ديپلومدارمەن ماراپاتتالدى.