الماتى وبلىسىندا دەمالىس كۇندەرى قاتاڭ شەكتەۋلەر بولادى
ينفەكتسيالىق ستاتسيوناردىڭ تولىمدىلىعى 43 پروتسەنتتى، رەانيماتسيالىق توسەكتەر تولىمدىلىعى 15 پروتسەنتتى قۇراپ وتىر. بۇل تۋرالى بۇگىن ۇكىمەت وتىرىسىندا وڭىردەگى سانيتارلىق- ەپيدەميولوگيالىق جاعداي تۋرالى قىسقاشا بايانداعان وبلىس اكىمى اماندىق باتالوۆ ايتتى. ءوڭىر باسشىسىنىڭ ايتۋىنشا، وبلىستىڭ مەديتسينالىق ۇيىمدارى قاجەتتى جابدىقتارمەن جانە دارىلىك پرەپاراتتارمەن قامتاماسىز ەتىلگەن. ينفەكتسيالىق ستاتسيونارداعى توسەكتەر سانى 412 گە كوبەيتىلىپ، قازىر سانى 1550 بىرلىككە جەتكىزىلدى. بيىلعى جىلدىڭ باسىنان باستاپ 11 پ ت س ر- زەرتحاناسىندا 137 مىڭ تەست وتكىزىلگەن. 391 ءموبيلدى بريگادا كوروناۆيرۋس كۇدىگى بار ناۋقاستاردىڭ ۇيىنە بارىپ 50,7 مىڭنان استام مەديتسينالىق قىزمەت كورسەتتى. وبلىستا اۋرۋ دەڭگەيىنىڭ وسۋىنە بايلانىستى كارانتين رەجيمى كۇشەيتىلدى. بەلگىلى بولعانداي، مەكتەپكە دەيىنگى مەكەمەلەردىڭ، قوعامدىق تاماقتانۋ وبەكتىلەرىنىڭ، ءدىني ۇيىمدارىنىڭ، قوعامدىق مونشالار مەن كولىك جۇمىسى ساعات 17 گە دەيىن، ويىن- ساۋىق وبەكتىلەرى مەن مەيرامحانالاردىڭ جۇمىسى ساعات 21-گە دەيىن كەلۋشىلەر سانىن ەسكەرە وتىرىپ شەكتەلدى. دەمالىس كۇندەرى وبلىستا تولىق لوكداۋن ەنگىزىلەدى.
«الماتى قالاسى مەن وبلىس اراسىندا حالىق كوشى- قونىنىڭ جيىلەۋىنە بايلانىستى قالا ماڭىنداعى جامبىل، قاراساي، تالعار، ەڭبەكشى قازاق، ىلە اۋداندارىندا اۋرۋ دەڭگەيىنىڭ ءبىرشاما ءوسۋى بايقالادى، باس سانيتارلىق دارىگەرلەر شەكتەۋ شارالارىن كۇشەيتۋ جونىندە جەكەلەگەن قاۋلىلار قابىلدادى»، - دەپ اتاپ ءوتتى ا. باتالوۆ.
