شەتەلدەگى قانداستار «قايىرىمدى ىستەر مارافونىنا» قاتىسا الادى
«قايىرىمدى ىستەر مارافونى» - ۇيىمداردى، ادامداردى جانە قاراپايىم قازاقستاندىقتاردى بىرىكتىرەتىن جالپى ۇلتتىق قوزعالىس. «قايىرىمدى ىستەر مارافونىنىڭ» نەگىزگى ءمانى - ادامداردى مەيىرىمدى بولۋعا، ىزگىلىكپەن اينالىسۋعا ىنتالاندىرۋ عانا ەمەس، سەبەبى ءاربىر قازاقستاندىقتا وسىنداي قاجەتتىلىك بار. ازاماتتىق باستامالاردى قولداۋ ورتالىعى ۇيىمداستىرۋ كوميتەتى رەتىندە بۇكىل اكتسيانىڭ اكىمشىلىك، ۇيىمداستىرۋشىلىق جانە ءادىسنامالىق ۇيلەستىرۋشىسى رەتىندە جۇمىس ىستەيدى. ءبىز ءار قازاقستاندىقتىڭ جاسىنا جانە الەۋمەتتىك مارتەبەسىنە قاراماستان قايىرىمدىلىقتىڭ ءومىرىنىڭ ءبىر بولىگىنە اينالۋى ءۇشىن تىرىسامىز»، - دەدى ل. دياس ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ونىڭ ايتۋىنشا، اكسيا باستالعاننان كەيىن ءبىر ايدا اكسياعا 60-تان استام ۇەۇ، شاعىن جانە ورتا بيزنەس وكىلدەرى، ۇلتتىق حولدينگتەر، جەكە جانە كۆازيمەملەكەتتىك كومپانيالار، قايىرىمدىلىق قورلارى، قوعامدىق ۇيىمدار، ۆولونتەرلىك توپتار، ج و و جانە كوللەدج وكىلدەرى، اكىمدىكتەر قولداۋ كورسەتكەن.
ءبىر اي بويى 47 مىڭ ۆولونتەر مارافوننىڭ بارلىق قاتىسۋشىلارىنا جۇمىسقا ورنالاسۋعا كومەكتەسەدى، ادىستەمەلىك كومەك كورسەتەدى. مارافون اياسىنداعى ءىس- شارالار ءار ايعا جوسپارلانعان. سپيكەر مارافون اياسىندا 345 ءىس- شارا وتكىزىلگەن شىعىس قازاقستان وبلىسى ەڭ بەلسەندى ايماق ەكەنىن اتاپ ءوتتى. رەسپۋبليكا بويىنشا مارافون اياسىندا 1,5 مىڭعا جۋىق ءىس- شارالار مەن اكسيالار، جوبالار جۇزەگە اسىرىلعان. ەكى ميلليونعا جۋىق ادام مارافوننىڭ بەلسەندى قاتىسۋشىسى اتاندى. ولار ءار ءتۇرلى ىستەرمەن اينالىسادى - مۇقتاج ادامدارعا كومەكتەسەدى، قار كۇرەيدى، قان تاپسىرادى، اعاش ەگەدى، قايىرىمدىلىق قورلارىنا قايىرىمدىلىق جاسايدى جانە ەكولوگيالىق اكسيالار وتكىزەدى.
«الداعى ايلاردا ءبىرقاتار ءىس- شارا جوسپارلانعان. اتاپ ايتقاندا، 18 - ناۋرىزدا ناۋرىز مەيرامىنا ورايلاستىرىلعان قايىرىمدىلىق كۇنى وتكىزىلەدى. 15-21 - ناۋرىز ارالىعىندا ەكولوگيالىق شارالار وتكىزۋگە كوڭىل ءبولىنىپ، ەكولوگيالىق مەيىرىمدىلىك اپتالىعى وتەدى. ءساۋىر ايىندا «ەڭ مەيىرىمدى» بايقاۋلار سەرياسى باستالادى، ولاردىڭ ءبىرىنشىسى «ەڭ مەيىرىمدى ايماق» دەپ اتالادى»، - دەپ ءتۇسىندىردى ل. دياس.
تىلشىلەر سۇراعىنا جاۋاپ بەرە وتىرىپ، سپيكەر «قايىرىمدى ىستەر مارافونىنا» شەت ەلدەردەگى ەتنيكالىق قازاقتار دا جانە شەتەلدە تۇراتىن جانە جۇمىس ىستەيتىن قازاقستاندىقتار دا قوسىلا الاتىنىن اتاپ ءوتتى.
«ارينە، قازاقستان رەسپۋبليكاسىنان تىس جەرلەردە تۇراتىن وتانداستارىمىز مارافونعا قاتىسۋى كەرەك، ەشقانداي اۋماقتىق شەكتەۋلەر جوق. مارافوندى ۇيىمداستىرۋشىلاردىڭ الدىنا قويعان جاھاندىق ماقساتتارىنىڭ ءبىرى - مارافونعا قازاقستاندىقتاردى عانا ەمەس، باسقا ەلدەردىڭ وكىلدەرىن دە تارتۋ بولاتىن. سوندىقتان ءبىز وتانداستارىمىز، قانداستارىمىز كوتەرەتىن باستامالاردى قۋانا قابىلدايمىز. سونىمەن قاتار، ءبىز «وتانداستار» قورىمەن ءوزارا كەلىسىم بەكىتتىك، بۇل قور شەتەلدەگى ءبىزدىڭ ارىپتەسىمىز جانە وسى باستامالاردىڭ ۇيلەستىرۋشىسى بولا الادى دەپ ۇمىتتەنەمىز»، - دەدى ل. دياس ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سونىمەن بىرگە، ق ر اقپارات جانە قوعامدىق دامۋ مينيسترلىگى ازاماتتىق قوعام ىستەرى كوميتەتىنىڭ ءتوراعاسى ماديار قوجاحمەت «قايىرىمدى ىستەر مارافونىنىڭ» الداعى جىلدارى دا جالعاساتىنىن ايتتى. «قايىرىمدى ىستەر مارافونى ءارى قاراي جالعاسا بەرەدى. وتكەن جىلدان باستاپ، بۇل شارالار تەك قانا حالىقتىڭ اراسىندا ەمەس، مەملەكەتتىك جانە ۇلتتىق دەڭگەيدە قولداۋ تاۋىپ، قازىرگى تاڭدا ىسكە اسىرىلىپ جاتىر. وعان ارنايى ۇيىمداستىرۋشىلىق كومەكتەر جاسالىپ جاتىر. بۇل جۇمىستىڭ ناتيجەلىگىن وتكەن جىلى كوردىك، بيىل دا مىسالى قىستىڭ قيىن كەزەڭىندە ۆولونتەرلەر ءبىر- بىرىنە كومەكتەسىپ جاتقان كەزدە كورىپ جاتىرمىز. سوندىقتان، بۇل مارافوننىڭ ءارى قاراي جالعاسۋى ءسوزسىز. سونىمەن بىرگە، باياندامامدا ايتىپ كەتكەندەي، مەملەكەت باسشىسى ب ۇ ۇ اياسىندا ۆولونتەرلىك باستامالاردى ۇلتتىق دەڭگەيدە عانا ەمەس، حالىقارالىق دەڭگەيگە كوتەرىپ، الداعى جىلداردىڭ ءبىرىن ۆولونتەرلەردى جۇمىلدىرۋدىڭ حالىقارالىق جىلى دەپ جاريالاۋ باستاماسىن كوتەردى. سوندىقتان وسىنداي شارالار مەن باستامالاردى ءوز ەلىمىزدىڭ اياسىندا ەمەس، حالىقارالىق دەڭگەيدە ىسكە اسۋى دا بۇل جىلدىڭ جاريالانۋىنا سەپتىگىن تيگىزەدى. بۇل جۇمىستى ءوز تاراپىمىزدان جالعاستىرىپ، بارشا ادامداردى وسى شاراعا قاتىسۋعا شاقىرامىز»، - دەپ جاۋاپ بەردى م. قوجاحمەت ءتىلشى سۇراعىنا.
ەستەرىڭىزگە سالا كەتەيىك، قازاقستان تاۋەلسىزدىگىنىڭ 30 جىلدىعى اياسىندا مەملەكەت باسشىسىنىڭ باستاماسىمەن «قايىرىمدى ىستەر مارافونى» جالپى ۇلتتىق جوباسى باستالدى. مارافونعا قاتىسۋعا بارلىق قازاقستاندىقتار، سونىڭ ىشىندە مەملەكەتتىك جانە قوعامدىق ۇيىمدار، بيزنەس جانە ج و و وكىلدەرى شاقىرىلدى. جوبانىڭ ۇيلەستىرۋشىسى - ازاماتتىق باستامالاردى قولداۋ ورتالىعى. ۇيىمداستىرۋ ىسىنە قاتىستى سۇراقتارى بويىنشا 87172221224 نومىرىنە حابارلاسۋعا بولادى.
اۆتور: ايجان سەرىكجان قىزى
