جانداربەك بەكشين كوروناۆيرۋستىڭ وزگەرگەن شتامى قالاي انىقتالاتىنىن ايتتى
ونىڭ ايتۋىنشا، كوروناۆيرۋستىڭ قۇرامى مەن مۋتاتسياعا ۇشىراۋىن ءجىتى باقىلاپ وتىراتىن ارنايى ماماندار بار.
«نۇر- سۇلتان قالاسىندا سوڭعى ۇلگىدەگى جانە قازىرگى زامانعا ساي زەرتتەۋ جۇرگىزەتىن «سەكۆيناتور» دەگەن اسپاپ بار. ونىمەن زەرتتەۋ جۇمىستارى قازىر دە ءجۇرىپ جاتىر. ەۋروپا ەلدەرىنەن وزگەرگەن شتامدار انىقتالمادى. بۇل جۇمىستى رەسپۋبليكالىق ۆەدومستۆوارالىق كوميسسيانىڭ تاپسىرماسى بويىنشا كۇشەيتىپ جاتىرمىز. ءبىر اپتادان كەيىن «سەكۆيناتور» الماتىعا دا جەتكىزىلىپ، عىلىمي زەرتتەۋلەر جۇرگىزىلەتىن بولادى. ونىڭ باستى ماقساتى - وزگەرگەن شتامداردى انىقتاۋ»، - دەيدى جانداربەك بەكشين.
سونىمەن قاتار، ول كوروناۆيرۋس ينفەكتسيانىڭ كەڭ تارالعان بەس ءتۇرى بار ەكەنىن اتاپ ءوتتى.
«بۇل ءبىر بريتاندىق، ەكى امەريكاندىق، ءبىر برازيليالىق شتامم جانە وڭتۇستىك افريكالىق شتامم. ءبىز جاڭا شتامداردى انىقتاۋ ءۇشىن ارنايى جۇيە قۇردىق. زەرتتەۋ ناتيجەلەرى تۋرالى كەم دەگەندە ەكى اپتادان كەيىن عانا ايتا الامىز. بۇگىنگى كۇنگە دەيىن پتر تەستتەرىنىڭ ناتيجەلەرى بويىنشا كوروناۆيرۋستىڭ 145 تۇرلەندىرىلگەن ءتۇرى انىقتالدى. ءبىراق، پاتوگەندىك وزگەرىستەر انىقتالعان جوق»، - دەدى ول.
ايتا كەتەيىك، الماتى قالاسى باس مەملەكەتتىك سانيتار دارىگەرىنىڭ جاڭا قاۋلىسىنا سايكەس وتكەن دەمالىس كۇندەرى ساۋدا ۇيلەرى، بازار جۇمىسى مەن قوعامدىق كولىك توقتاعان بولاتىن.
