قۇرىق تەڭىز پورتىندا استىق تەرمينالى سالىنىپ جاتىر

بۇل جايىندا ماڭعىستاۋ وبلىسى اكىمىنىڭ باسپا ءسوز قىزمەتى مالىمەت تاراتتى. «قۇرىق پورتى» ج ش س باس ديرەكتورى سەرىك احمەتوۆ وبلىس اكىمىنە پورتتىڭ وندىرىستىك قىزمەتى، استىق تەرمينالىنىڭ قۇرىلىسى تۋرالى بايانداما جاساپ، الداعى جوسپارىن ءبولىستى.

«2020-جىلى قۇرىق پورتىنىڭ اۋماعىندا استىق تەرمينالىنىڭ قۇرىلىسى باستالدى. جوبانى «kaspi grain way» ج ش س جۇرگىزەدى. ينۆەستور قاراجاتى ەسەبىنەن قۇرىلىس نىسانىنا 6 ميلليارد تەڭگە جۇمسالادى. جۇمىستىڭ العاشقى كەزەڭىندە 40 ادام ۋاقىتشا جۇمىسپەن قامتىلادى جانە نىسان ىسكە قوسىلعاننان كەيىن 30 ادام تۇراقتى جۇمىسقا ورنالاسادى»، - دەدى سەرىك احمەتوۆ.

بۇل جوبا قۇرىق پورتىندا ءداندى جانە مايلى داقىلداردى اۋىستىرىپ تيەۋ بويىنشا زاماناۋي استىق تەرمينالىن قۇرۋعا مۇمكىندىك بەرەدى.

وسىلايشا ەلدىڭ ترانزيتتىك جانە ەكسپورتتىق الەۋەتىن ارتتىرۋعا جانە وتاندىق شاعىن جانە ورتا بيزنەستى دامىتۋعا ۇلكەن سەپتىگىن تيگىزبەك.

جۇمىس باستالعاندا قازاقستاندىق جانە حالىقارالىق استىق كومپانيالارىنىڭ تاجىريبەسى ەسكەرىلىپ، ەۋروپالىق وندىرۋشىلەردىڭ تەحنيكالىق جابدىقتارى پايدالانىلادى.

قۇرىلىس جۇمىسى 2022-جىلدىڭ قىركۇيەك ايىندا اياقتالادى دەپ جوسپارلانعان.