ۇلتتىق قاۋىپسىزدىك كوميتەتى الماتىداعى ۇشاق اپاتىنىڭ ءمان-جايىن انىقتاپ جاتىر

نۇر-سۇلتان. قازاقپارات - ۇلتتىق قاۋىپسىزدىك كوميتەتى الماتى ماڭىنداعى ۇشاق اپاتىنا قاتىستى پىكىر ءبىلدىردى، دەپ حابارلايدى قازاقپارات.

قاۋىپسىزدىك ۆەدومستۆوسىنىڭ مالىمەتىنە سەنسەك، قازىر وقيعانىڭ ءمان-جايى انىقتالىپ جاتىر.

«13- ناۋرىزدا الماتى قالاسىنىڭ اۋەجايىنا قونۋ كەزىندە ۇلتتىق قاۋىپسىزدىك كوميتەتى اۆياتسيا قىزمەتىنىڭ «ان-26» اۋە كەمەسى (بورتتىق ءنومىرى - 02) اپاتقا ۇشىرادى. بورتتا 6 ەكيپاج مۇشەسى بولدى، ونىڭ 4 قازا تاۋىپ، 2 اۋىر جاراقاتتارمەن گوسپيتالعا جاتقىزىلدى. اۆياتسيالىق وقيعانىڭ سەبەپتەرى انىقتالىپ جاتىر»، - دەلىنگەن حابارلامادا.

ەسكە سالا كەتەيىك، كەشە نۇر- سۇلتان-الماتى باعىتىندا كەلە جاتقان ان-26 اسكەري ۇشاعى 17.22 كەزىندە راداردان جوعالىپ، قالا اۋەجايى ماڭىندا اپاتقا ۇشىراعان ەدى.

ۇشاقتا بولعان 4 ادام قازا تاپتى. 2 ادام ءتۇرلى جاراقاتپەن الماتى قالاسىنىڭ 4№ قالالىق كلينيكالىق اۋرۋحاناسىنا جەتكىزىلدى.