سەرىك ساپيەۆ، دانيار ەلەۋسىنوۆ باستاعان چەمپيوندار كىتاپحاناعا جەكە زاتتارىن سىيلادى

نۇر-سۇلتان. قازاقپارات - قازاقستاننىڭ وليمپيادا چەمپيوندارى مەن وزگە دە تانىمال سپورتشىلارى ەلورداداعى ق ر تۇڭعىش پرەزيدەنتى-ەلباسى كىتاپحاناسىنا جينالىپ، جەكە زاتتارىن سىيعا تارتتى، دەپ حابارلايدى قازاقپارات.

بۇگىن ەلباسى كىتاپحاناسىندا داڭقتى قازاقستاندىق سپورتشىلار، ءتۇرلى سپورت ۇيىمدارىندا تاربيەلەنۋشى جەتكىنشەكتەر مەن پارلامەنت دەپۋتاتتارىنىڭ قاتىسۋىمەن «قازاقستان ماقتانىشى» سپورت-ريەۆيۋى ءوتتى.

ەلباسى كىتاپحاناسى تاۋەلسىزدىكتىڭ 30 جىلدىعىنا وراي «قازاقستان ماقتانىشى» اتتى اۋقىمدى جوبانى قولعا الىپ وتىر. جوبا بيىلعى 8- ناۋرىزدا «بولاشاق» حالىقارالىق باعدارلاماسىنىڭ 30 ۇزدىك تۇلەگىمەن وتكەن ينتەراكتيۆتى كەزدەسۋدەن باستاۋ الدى.

ال بۇگىنگى شارا بارىسىندا وليمپيادا چەمپيوندارى مەن قازاقستاننىڭ اتاقتى سپورتشىلارىنىڭ جەكە زاتتارىن ەلباسى كىتاپحاناسىنىڭ مۋزەيىنە سىيعا تارتۋ ءراسىمى ءوتتى.

اتاپ ايتقاندا، قازاقستاندىق مانەرلەپ سىرعاناۋشى ەليزابەت تۇرسىنبايەۆانىڭ اكەسى بايتاق تۇرسىنبايەۆ الەم چەمپيوناتىندا قىزىنىڭ تورتتىك سالحوۆ جاساپ، قازاقستاندى الەمدىك قىسقى سپورت تاريحىنا قوسقان كونكيىن تابىستادى. سەرىك ساپيەۆ 2009-جىلعى الەم چەمپيوناتىنا كيىپ بارعان فورماسىن سىيعا تارتتى. گرەك-ريم كۇرەسىنىڭ شەبەرى يۋري مەلنيچەنكو جەڭىپ العان كوپتەگەن كۋبوكتارىنىڭ ءبىرىن سىي ەتتى.

كوركەم گيمناستشى ءاليا ءجۇسىپوۆا حالىقارالىق تۋرنيردەن مۇسىنشەنى، اتاۋلى مەدال مەن تاياقشاسى بار لەنتانى تابىس ەتتى. اۋىر اتلەت يليا يلين مۇراجاي كوللەكتسياسىن 2014-جىلعى التىن مەدالمەن تولىقتىردى.

دانيار ەلەۋسىنوۆ مۋزەيگە ءوزىنىڭ «التىن» بوكس قولعابىن تاپسىردى. ەركىن كۇرەس شەبەرى گۇزەل مانيۋروۆا «جەڭىستى» تريكوسىن بەردى.

قازاق كۇرەسىنەن بەلگىلى سپورتشى بەيبىت ىستىبايەۆ 2015-جىلى ەلباسىنىڭ ءوزى تاپسىرعان بەلبەۋدى ۇسىندى. دجيۋ-دجيتسۋ شەبەرى ءمولدىر مەكەنبايەۆا 2019-جىلى موڭعوليادا وتكەن ازيا چەمپيوناتىنىڭ مەدالدارىن تارتۋ ەتتى. دارحان نورتايەۆ قازاقستان دجيۋ-دجيتسۋ قاۋىمداستىعىنىڭ اتىنان الەم چەمپيوناتىنىڭ كۋبوگىن تاپسىردى.

سونىمەن قاتار، قازاقستان بايكەرلەر قاۋىمداستىعىنىڭ پرەزيدەنتى دميتري پەترۋحين ءوز ولجالارىن ەلباسى كىتاپحاناسىنا وتكىزدى. ءىس-شارادا الىپ كۇش يەسى، كۇش قولداناتىن نومىرلەر اراسىنداعى الەمنىڭ ءتورت دۇركىن رەكورد يەسى، قاجىمۇقان مۇڭايتپاسوۆ پەن بالۋان شولاقتىڭ مۇراسىن جالعاستىرۋشى، ق ر مادەنيەت جانە سپورت مينيسترلىگىنىڭ ەلىمىزدەگى كۇش مادەنيەتىن دامىتۋ جونىندەگى وكىلى سەرگەي تسىرۋلنيكوۆ تا بوي كورسەتتى.

قوناقتاردىڭ الدىندا ول كۇش ونەرىن پاش ەتىپ، ات تاعاسىن مايىستىردى. كەيىننەن تاعانى مۋزەيدىڭ قورىنا وتكىزدى. سپورت-ريەۆيۋ بارىسىندا سپورتشىلار تاپسىرعان جەكە زاتتار مەن مۇراعات ماتەريالدارى ەلباسى كىتاپحاناسىنىڭ ەكسپوزيتسيالارىنان لايىقتى ورىن تاۋىپ، جۇرتشىلىقتىڭ يگىلىگىنە اينالادى. سونداي-اق جيىن بارىسىندا ق ر تۇڭعىش پرەزيدەنتى - ەلباسى كىتاپحاناسى مەن ق ر مادەنيەت جانە سپورت مينيسترلىگى اراسىندا ىنتىماقتاستىق تۋرالى مەموراندۋمعا قول قويىلدى.

قۇجاتتى ەلباسى كىتاپحاناسىنىڭ ديرەكتورى باقىتجان تەمىربولات پەن ق ر م س م سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سەرىك ساپيەۆ بەكىتتى.