كوروناۆيرۋسپەن كۇرەس: دارىگەرلەردى ۇستەماقىدان قاققان كىمدەر

نۇر-سۇلتان. قازاقپارات - كوروناۆيرۋسپەن كۇرەسكە جۇمىلدىرىلعان مەديتسينا قىزمەتكەرلەرىنە تيەسىلى ۇستەماقىنى تولەۋ كەزىندە جەمقورلىققا بوي الدىرعان ءبىراز شەنەۋنىك جازاعا تارتىلدى.

بۇل تۋرالى ق ر سىبايلاس جەمقورلىققا قارسى ءىس- قيمىل اگەنتتىگىنەن ءمالىم ەتتى، دەپ حابارلايدى قازاقپارات ءتىلشىسى.

ماسەلەن، تالدىقورعان قالاسىنداعى اسكەري گوسپيتالدىڭ باستىعى كولبايەۆقا الماتى گارنيزونى اسكەري سوتىنىڭ ۇكىمىمەن 2 جىلعا باس بوستاندىعىنان شەكتەۋ جازاسى بەرىلدى. ول گوسپيتالدىڭ اعا مەدبيكەسى، سەرجانت ازيماحۋنوۆانىڭ دەلدالدىعىمەن مەديتسينالىق مەكەمەگە جۇمىسقا تۇرعان قاسانعاليەۆتەن 1 ميلليون تەڭگە نەمەسە مەديتسينالىق جاردەماقىنىڭ 50 پايىزىن پارا رەتىندە العانى ءۇشىن ايىپتالدى.

ال جامبىل وبلىسىندا اۋداندىق اۋرۋحانالاردىڭ ءبىرىنىڭ باسشىسىنا قاتىستى پاندەميامەن كۇرەسكە جۇمىلدىرىلعان اۋرۋحانا قىزمەتكەرلەرىنە تيەسىلى 2,7 ميلليون تەڭگەدەن الىم- سالىق جيناۋ فاكتىسى بويىنشا سوتقا دەيىنگى تەرگەۋ جۇرگىزىلىپ جاتىر.

شىمكەنت قالاسىنداعى مەديتسينالىق مەكەمەنىڭ لاۋازىمدى تۇلعاسىنا قاتىستى دا ۆيرۋس جۇقتىرۋ تاۋەكەلى جوعارى توپقا جاتپايتىن قىزمەتكەرلەرگە 50 ميلليون تەڭگەدەن استام ۇستەمەاقى تولەگەنى ءۇشىن ءىس قوزعالىپ وتىر. قىزىلوردا وبلىسىندا دا اۋداندىق اۋرۋحانالاردىڭ مەديتسينا قىزمەتكەرلەرىنە 12 ميلليون تەڭگەدەن استام نەگىزسىز ۇستەمەاقى تولەۋ فاكتىسى بويىنشا تەرگەۋ جۇرگىزىلۋدە. اقتوبە وبلىسىندا دا مەديتسينالىق ۇستەمەاقى تولەۋ بارىسىنداعى زاڭسىزدىقتار بويىنشا مەملەكەتتىك اۋديت ماتەريالدارى وبلىس اكىمدىگىنە شارا قابىلداۋ ءۇشىن جىبەرىلگەن.

ناتيجەسىندە حرومتاۋ، مۇعالجار، العا، مارتۇك، شالقار اۋداندىق اۋرۋحانالارىنىڭ، اقتوبە مەديتسينالىق ورتالىعىنىڭ باس دارىگەرلەرى مەن مەديتسينا قىزمەتكەرلەرى تارتىپتىك جازاعا تارتىلدى.

اۆتور: مارلان جيەمباي