قازاقستاندا العاش رەت ەرەكشە بالالارعا ارنالعان انيماتسيا مەكتەبى جۇمىسىن باستادى

ارنايى جوبا ورتالىق ازيادا العاش رەت جۇزەگە اسىرىلۋدا. مەكتەپ وقۋشىلارىنا قازاقستاننىڭ، جاپونيانىڭ، وڭتۇستىك كورەيانىڭ ۇزدىك مۋلتيپليكاتورلارى ءدارىس وقيدى.

مەكتەپ ەرەكشە ءبىلىم الۋ قاجەتتىلىكتەرى بار بالالاردىڭ الەۋمەتتىك بەيىمدەلۋىنە ىقپال ەتەتىن جاڭا داعدىلاردى ۇيرەنۋگە جانە قابىلەتىن ارتتىرۋعا مۇمكىندىك بەرەدى. ۇيىمداستىرۋشىلار الەۋمەتتىك قولداۋدان باسقا، تەلەۆيزيالىق ديزاين سالاسىندا سۇرانىسقا يە مامانداردى وقىتۋدى جانە ۇزدىك تۇلەكتەردىڭ بولاشاقتا جۇمىسقا ورنالاسۋىنا مۇمكىندىك جاساۋدى كوزدەيدى.

«Balapan» تەلەارناسى جانىنداعى مەكتەپتىڭ تاعى ءبىر ەرەكشەلىگى، جاس وسپىرىمدەر وقۋدان كەيىن قالىپتاسقان ەرەسەك مامانداردان كەڭەس پەن قولداۋ الا الادى. جوباعا قاتىسۋ ءۇشىن 14-16 جاس ارالىعىنداعى 30 بالا ىرىكتەلىپ الىندى، ولار 2021-جىلدىڭ ناۋرىز-تامىز ايلارىندا ونلاين-فورماتتا وقيدى.

وقۋدىڭ ءبىرىنشى ايىندا بالالار انيماتسيا نەگىزدەرى بويىنشا جالپى ءدارىس وقيدى دەپ جوسپارلانعان. ءارى قاراي قىزىعۋشىلىعى مەن بەيىمىنە قاراي بىرنەشە توپقا ءبولىنىپ وقىتىلادى.

وقۋعا ءتۇسۋدىڭ نەگىزگى تالاپتارى — بالالاردىڭ وقۋعا دەگەن ىنتاسى مەن قىزىعۋشىلىعى، جاس وسپىرىمدەردىڭ شىعارماشىلىق الەۋەتى. سونىمەن قاتار انيماتسيا سالۋ ادامعا فيزيكالىق تۇرعىدا كۇش تۇسىرمەيدى.

بۇگىنگى تاڭدا قازاقستاندا انيماتسيالىق ديزاين سالاسى قارقىندى دامىپ كەلەدى. وقۋ كۋرسى تەگىن جانە جەكە انيماتسيالىق ستۋديالاردىڭ اتسالىسۋىمەن قايىرىمدىلىق جوبا رەتىندە جۇزەگە اسىرىلادى.

«Qazaqstan» تەلەراديوكورپوراتسياسى بالالارعا وقۋ ءۇشىن قاجەتتى ارنايى پلانشەت پەن باسقا دا تەحنيكالىق قۇرالمەن قامتاماسىز ەتەدى.