كوكشەتاۋدا «ۇلتتىق كيىممەن جۇمىسقا» اتتى جاڭا چەللەندج باستالدى
«ۇلتتىق كيىممەن جۇمىسقا» اتتى باستامانى وبلىستىق مادەنيەت باسقارماسى قولعا الدى. ماماندار ايماقتاعى بارلىق مەملەكەتتىك مەكەمە قىزمەتكەرلەرىن ناۋرىزدا كەم دەگەندە ءبىر كۇن كەڭسەگە قازاقى ناقىشتاعى كيىممەن كەلۋگە ۇندەيدى. مادەنيەتكە جاۋاپتىلار ءبىر اي بويى ۇلتتىق كيىممەن جۇرمەك. ولار ەستافەتانى ىشكى ساياسات باسقارماسى مەن جەرگىلىكتى «كوكشە» تەلەارناسىنىڭ ۇجىمىنا جولدادى. ناۋرىز مەرەكەسىنە ارنالعان ءىس- شارا ايدىڭ سوڭىنا دەيىن جالعاسادى.
دينا بەيسەمبايەۆا، قالالىق مادەنيەت جانە تىلدەردى دامىتۋ ءبولىمىنىڭ باس مامانى:
- ءبىز وتە قۋانا- قۋانا كەلىستىك. بۇگىن مىنە، ءبىرىنشى كۇنى كامزول كيىپ كەلدىم. بۇل اجەمنىڭ كامزولى. ناۋرىز كۇندەرى تاعى بىرنەشە ۇلتتىق كيىمدى اۋىستىراتىن بولامىز. تۇستەرى سونداي اشىق. جارقىراعان. ءاربىر ادامنىڭ ەرەكشەلىگىن اشاتىن سياقتى، مەنىڭ ويىمشا.
