قازاقستاننىڭ اۋە كۇشتەرى جاڭارتىلعان ۇشاقتارمەن تولىقتى

بالقاش. قازاقپارات - بالقاش قالاسىنداعى قازاقستان اۋە قورعانىسى كۇشتەرىنىڭ وقۋ- اۆياتسيالىق ورتالىعىنا L-39 وقۋ- جاۋىنگەرلىك ۇشاقتارى كەلدى.

مەملەكەتتىك قورعانىستىق تاپسىرىس شارتى شەڭبەرىندە وتكەن جىلدىڭ سوڭىندا ولار ءوندىرۋشى زاۋىتقا جىبەرىلدى. وندا كۇردەلى جوندەۋ جۇمىستارى جۇرگىزىلىپ، جاڭعىرتۋدان ءوتتى. بۇل تۋرالى قازاقپارات ق ر قورعانىس مينيسترلىگىنە سىلتەمە جاساپ حابارلايدى.

مودەرنيزاتسيا بارىسىندا ۇشاقتارعا جاڭا سيفرلىق اۆيونيكا، كاتاپۋلتتاۋ جۇيەلەرى، بايلانىس جانە وبەكتيۆتى باقىلاۋ قۇرالدارى ورناتىلدى. L-39 كۋرسانتتاردى كۇندىز جانە تۇندە قاراپايىم جانە كۇردەلى مەتەوجاعدايلاردا، ۇشۋ تەحنيكاسىنا باستاپقى وقىتۋعا، جاۋىنگەرلىك قولدانۋ ەلەمەنتتەرىن وقىتۋعا، سونداي- اق وقۋ ورىندارى مەن اسكەري بولىمدەردىڭ ۇشقىشتار قۇرامىن جاتتىقتىرۋعا ارنالعان. كۋرسانتتارعا اۋە كەمەسىن مەڭگەرۋگە تاجىريبەلى ۇشقىش- نۇسقاۋشىلار كومەكتەسەدى.

- جالپى العاندا L-39 ۇشاعىمەن ۇشۋ، اۆياتسيانى مەڭگەرۋدەگى العاشقى قادام بولىپ تابىلادى. ءاربىر كۋرسانت ءۇشىن جەكە ءوزى ۇشۋ - وتە ماڭىزدى ءسات. بۇل ول بولاشاقتا قاراپايىم، كۇردەلى پيلوتاج جاساۋ، بۇلتتاردا، تومەن بيىكتىكتە، جەرءۇستى جانە اۋە نىسانالارى بويىنشا جاۋىنگەرلىك قولدانۋعا ۇشۋ سىندى كەزەڭدەرگە قول جەتكىزە الادى دەگەندى بىلدىرەدى، - دەپ اتاپ ءوتتى وقۋ- اۆياتسيا ورتالىعى كومانديرىنىڭ ورىنباسارى پودپولكوۆنيك ماقسات بۇراتايەۆ.

Aero L - 39 Albatros - ۇشقىشتار قۇرامىن دايارلاۋعا ارنالعان رەاكتيۆتى وقۋ- جاۋىنگەرلىك ۇشاعى. كەيبىر موديفيكاتسيالارىن جەڭىل شابۋىلداۋشىلار مەن جويعىش ۇشاقتار رەتىندە پايدالانۋعا بولادى. 2018 -جىلعى جاعداي بويىنشا ول الەمنىڭ 30-دان استام ەلىندە پايدالانىلعان، ۇشۋ ۋچيليشەلەر كۋرسانتتارىن دايارلاۋعا ارنالعان نەگىزگى ماشينالاردىڭ ءبىرى بولىپ تابىلادى. رەاكتيۆتى قوزعالتقىش 6500 م بيىكتىكتە 760 ك م/ساع جىلدامدىققا جەتۋگە مۇمكىندىك بەرەدى. ۇشاقتىڭ قارۋ- جاراعىنا بومبالاۋشى، باسقارىلمايتىن زىمىران قارۋى جانە باسقارىلاتىن زىمىراندىق وقۋ قارۋى، كوزدەۋ جانە فوتو باقىلاۋ جابدىقتارى كىرەدى. بۇل تىك ءشۇيىلۋ كەزىندە 50-100 ك گ كاليبرلى ەركىن تۇسەتىن وق- دارىلەرمەن ماقساتتى بومبالاۋدى، س-5 ءتيپتى باسقارىلمايتىن زىمىراندارمەن ماقساتتى تۇردە وق اتۋدى، يميتاتورلاردى قولدانا وتىرىپ، اۋە نىسانالارى بويىنشا باسقارىلاتىن زىمىرانداردىڭ ىسكە قوسىلۋ يميتاتسياسىن ورىنداۋعا مۇمكىندىك بەرەدى.