بەنزين باعاسى ءالى دە وسەدى - ساراپشى

نۇر- سۇلتان. قازاقپارات - بەنزين مەن ەنەرگيا تاسىمالداۋشىلار باعاسى ءوسىپ جاتىر جانە وسە بەرەدى. بۇل تۋرالى مۇناي- گاز سالاسىنىڭ ساراپشىسى ولجاس ءبايدىلدينوۆ ايتىپ بەردى، دەپ حابارلايدى قازاقپارات.

«قازىرگى ءوسىم مۇنايدىڭ الەمدىك باعاسىنىڭ وسۋىمەن تۇسپا- تۇس كەلدى، سوندىقتان الەمدىك باعالارمەن بىرگە بىزدە دە بەنزين باعاسى ءوستى دەگەن قاتە پىكىر قالىپتاستى. 20 - ناۋرىزدا جازعانىمداي، سول كەزدەگى باعالار مۇناي ءوندىرۋشى جانە وڭدەۋشى كومپانيالار ءۇشىن ءتيىمسىز بولدى. نارىقتىق ەكونوميكادا باعالار ءبىر جىل بۇرىن ءوسۋى ءتيىس ەدى، ءبىراق 2020 -جىلعى قاڭتاردان باستاپ، تۇتىنۋشىلىق تومەندەپ، قايتا وڭدەۋگە ارنالعان اكسيزدەردىڭ وسۋىنە قاراماستان، باعا وزگەرگەن جوق»، - دەدى ولجاس ءبايدىلدينوۆ ورتالىق كوممۋنيكاتسيالار قىزمەتىندە وتكەن بريفينگتە.

ساراپشى ءبىر جىل بۇرىنعى جاعدايعا ايرىقشا توقتالدى. «ءبىر جىل بۇرىن كوپتەگەن «ساراپشىلار» ءبىر ءسوزدى قايتالادى: مۇنايدىڭ الەمدىك باعاسى 3 ەسە تومەندەدى، دەمەك قازاقستاندا دا باعا 3 ەسە قۇلدىراۋى ءتيىس. ىشكى نارىقتاعى باعالار بۇرىننان بەرى دوتاتسيالانادى جانە ولار الەمدىك باعادان ەداۋىر تومەن»، - دەپ تولىقتىردى ولجاس ءبايدىلدينوۆ.

ونىڭ ايتۋىنشا، باعا قىمباتتاعانشا قازاقستان الەمدەگى ەڭ ارزان بەنزين بويىنشا 7 - ورىندا بولسا، قازىر 8-9-ورىندا تۇر.

اۆتور: ايجان سەرىكجان قىزى