ساۋدا ءمينيسترى ازىق-تۇلىك باعاسىن تۇراقتاندىرۋ شارالارىن جاريالادى

نۇر-سۇلتان. قازاقپارات - بۇگىن ۇكىمەت وتىرىسىندا ق ر ساۋدا جانە ينتەگراتسيا ءمينيسترى باقىت سۇلتانوۆ ازىق-تۇلىك باعاسىن تۇراقتاندىرۋ شارالارىن جاريالادى، دەپ حابارلايدى قازاقپارات ءتىلشىسى.

ونىڭ اتاپ وتۋىنشە، الەۋمەتتىك ماڭىزى بار ازىق- تۇلىك تاۋارلارى باعاسىن تۇراقتاندىرۋ ماقساتىندا ساۋدا، اۋىل شارۋاشىلىعى مينيسترلىكتەرى باسەكەلەستىكتى قورعاۋ جانە دامىتۋ اگەنتتىگىمەن بىرلەسىپ، باعا تۇراقتاندىرۋ بويىنشا جول كارتاسىن ازىرلەدى.

«قۇجات 44 ناقتى ءىس- شارادان تۇرادى. ءار شارا بويىنشا ناقتى ورىنداۋ مەرزىمى مەن جاۋاپتى تۇلعالار بەكىتىلەدى. ولار ناۋرىز ايىنان باستاپ ىسكە اسىرىلادى. ءىس- شارالاردى 4 باعىتقا بولۋگە بولادى. ءبىرىشى باعىت - تەكسەرۋلەر مەن كومپلاەنس. ءىس- شارالار بۇقارالىق اقپارات قۇرالدار جانە الەۋمەتتىك جەلىلەر ارقىلى اتقارىلعان جۇمىستى جاريالاي وتىرىپ، مەملەكەتتىك ورگاندار تاراپىنان باعانى نەگىزسىز كوتەرگەن نارىق سۋبەكتىلەرىنە باقىلاۋدى كۇشەيتۋگە باعىتتالعان. اتاپ ايتقاندا، مونوپولياعا قارسى ءىس- شارالاردىڭ وتكىزىلۋى جانە ساۋدا جەلىلەرىندە ساۋدا ۇستەمەسىنىڭ كوتەرىلمەۋى كوزدەلەدى. بۇل بارلىق تەكسەرۋلەر موراتورييگە كىرمەيدى. سەبەبى حالىقتىڭ ءومىرى مەن دەنساۋلىعىنا قاتەر توندىرەدى. وسىعان وراي، شەكتى باعالاردى بەلگىلەۋمەن قاتار جەرگىلىكتى اتقارۋشى، مونوپولياعا قارسى جانە فيسكالدى ورگاندار بىرلەسىپ تەكسەرۋلەر جۇرگىزەدى»، - دەدى ول.

ءمينيستردىڭ اتاپ وتۋىنشە، ەكىنشى - ساۋدا ءىس-شارالار. ول قولدانىستاعى تەتىكتەردى جەتىلدىرۋدى كوزدەيدى. وسى شارالاردى ورىنداۋ ءۇشىن اكىمدىكتەر ساۋدا ساياساتىن ىسكە اسىرۋ جۇمىسىن جانە باقىلاۋ فۋنكتسيالارىن كۇشەيتۋى قاجەت. ونىڭ ىشىندە شەكتى باعالاردى بەلگىلەۋ، نارىق سۋبەكتىلەرىمەن شارتتار جاساسۋ، «اينالىم سحەماسىن» ۇلعايتۋ ۇسىنىلادى.

بۇعان قوسا، ەكسپورتتىق تاۋارلار مەن شيكىزاتقا كۆوتالاردى ورناتۋ قاراستىرىلعان.

«ءۇشىنشى باعىت - ءوندىرىستى ۇلعايتۋ جانە كاسىپورىنداردى قولداۋ. ءىس- شارالار كاسىپورىنداردىڭ وندىرىستىك قۋاتتارىن ۇلعايتۋعا، شىعىنداردى وتەۋ جانە قولدانىستاعىسۋبسيديالاردى قايتا قاراۋ ارقىلى ىنتالاندىرۋعا باعىتتالعان. الەۋمەتتىك ماڭىزى بار تاۋارلار وندىرۋشىلەرى ءۇشىن ەلەكتر ەنەرگياسى تاريفتەرىن ءبىر قالىپتا ۇستاۋ كوزدەلگەن. بۇدان باسقا، يمپورتقا جوعارى تاۋەلدى تاۋارلارعا باعدارلانا وتىرىپ، تۇراقتاندىرۋ قورلارى قايتا قارالاتىن بولادى. اۋىل شارۋاشىلىعى مينيسترلىگى ازىق- تۇلىك كەلىسىم شارت كورپوراتسياسىمەن بىرلەسىپ كوكتەمگى ەگىس جۇمىستارى كەزىندە فورۆاردتىق كەلىسىمشارتتاردى ۇلعايتۋ جونىندەگى جۇمىستى كۇشەيتەدى»، - دەدى باقىت سۇلتانوۆ.

ءمينيستردىڭ اتاپ وتۋىنشە، ءتورتىنشى باعىت - زاڭنامالىق وزگەرىستەر. بۇل باعىتتا مەملەكەتتىك ساتىپ الۋدىڭ كونكۋرستىق راسىمدەرىن وڭايلاتۋ، شەكتى باعالاردى بەلگىلەۋ تۋرالى قاۋلىلاردى كەلىسۋ مەرزىمدەرىن قىسقارتۋ، باعالاردى بولجاۋ تەتىگىن ەنگىزۋ سياقتى تۇبەگەيلى وزگەرىستەر قاراستىرىلعان.

«مەملەكەت باسشىسىنىڭ حالىققا ارنالعان جولداۋىندا تاپسىرىلعان، ۇلتتىق تاۋار وتكىزۋ جۇيەسى مەن الەۋمەتتىك ءاميانىن جەدەل ىسكە قوسۋ ءبىر جاعىنان باعانى تۇراقتاندارادى، ەكىنشى جاعىنان وتاندىق تاۋار وندىرۋشىلەر ءۇشىن ونىمدەرىن ساتۋ نارىعىنا جانە ولار ءۇشىن ەكونوميكانىڭ اينالىمىنداعى قارجى رەسۋرستارىنىڭ قول جەتىمدىلىگىن ارتتىرۋعا مۇمكىندىك بەرەدى»، - دەدى مينيستر.