جۋالىدا قۇرت سەحى ىسكە قوسىلدى
وتكەن جىلى كاسىپورىن 1200 توننا قاتتى ىرىمشىك، 263 توننا سارى ماي، 13 مىڭ ليتر ءسۇت وندىرىلگەن. زاۋىت ءسۇت ونىمدەرىنىڭ 70 پايىزىن رەسەي مەملەكەتىنە ەكسپورتتاۋدا. بۇگىندە كاسىپورىندا 140 ادام ەڭبەك ەتەدى. ولاردىڭ ءبىر جىلدىق جالاقىسىنا سەرىكتەستىك 154 ميلليون تەڭگەدەن استام قارجى ءبولىپ، ايلىق قورىن 10 پايىزعا جوعارلاتقان.
كاسىپورىنعا 18 اۋىل شارۋاشىلىعى كووپەراتيۆى، 60 شارۋا قوجالىعى، 30 جەكە كاسىپكەر ءسۇت وتكىزۋدە.
«زاۋىت 1951 -جىلى سالىنعان. «تاراز» الەۋمەتتىك- كاسىپكەرلىك كورپوراتسياسى» ا ق- نىڭ 45 پايىزدىق ۇلەسى بار. بۇگىنگى تاڭدا قۇرت سەحىن اشۋدامىز. ءونىمىن وتاندىق نارىققا شىعارۋدامىز.
الدا ونى دا ەكسپورتقا شىعارۋ جوسپارىمىزدا بار. رەسپۋبليكالىق، وبلىستىق جانە اۋداندىق جارمەڭكەلەرگە ءوز ءونىمىمىزدى تۇراقتى شىعارىپ، باعا نارىعىن تومەندەتۋگە ۇلەسىمىزدى قوسىپ كەلەمىز. وتكەن جىلى ءوندىرىس اينالىمىندا 4,7 ميلليارد تەڭگە بولسا، بيىل ونى 5,3-5,5 ميلليارد تەڭگەگە كوتەرۋ كوزدەلگەن. جۋىردا ەكى جىل بۇرىن قولعا العان جوبامىزدى ىسكە اسىرعالى وتىرمىز. ءسويتىپ ەندى ايران، قايماق شىعارۋدى دا قولعا الماق نيەتتەمىز. وعان كەرەكتى قۇرال- جابدىقتاردى ورنالاستىرۋدامىز. بۇل جوبامىز ىسكە اسسا، الداعى ۋاقىتتا تاعى دا 40-50 ادامدى جۇمىسپەن قامتيتىن بولامىز»، — دەيدى سەرىكتەستىك ديرەكتورى ابدىبەك پوشقايەۆ.
بۇدان بولەك، سەرىكتەستىكتىڭ جۇزەگە اسىرعالى وتىرعان جوباسىنىڭ ءبىرى «جۋالى» تاۋارلى ءسۇت فەرماسى جەلىسىن قۇرۋ. بۇل جوبانى جۇزەگە اسىرۋ ءۇشىن سەرىكتەستىك جۋالى اۋدانىنىڭ قاراساز اۋىلدىق وكرۋگىندەگى جۇرىمباي اۋىلىنان فەرما ساتىپ العان. ەندى فەرمانى ساۋىن سيىرعا تولتىرىپ، زاۋىتتى سۇتپەن قامتىماق.
«جىل ساناپ ءسۇتتىڭ جەتىسپەۋشىلىگى ورىن الۋدا. ءبىز كاسىپورىندى كەڭەيتۋدى قولعا العاندىقتان، ءسۇت ءوندىرۋ كولەمىن كوبەيتۋىمىز كەرەك. ويتكەنى، ساۋدا ورتالىقتارىنىڭ سۇرانىسىن قاناعاتتاندىرۋ ءۇشىن شيكىزات كوزىن مولايتپاي، جۇمىس كوزىن ۇيلەستىرمەي تىعىرىقتان شىعا الماسىمىز انىق»، — دەيدى ابدىبەك پوشقايەۆ.
وسىلايشا سەرىكتەستىك تاۋارلى ءسۇت فەرمالار جەلىسىن قالىپتاستىرىپ، شيكىزاتتى ءوز كۇشىمەن شەشپەك.
