بىشكەكتە اقتوتى رايىمقۇلوۆا قىرعىزستاندىق ارىپتەسىمەن كەزدەستى
بۇل تۋرالى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ حابارلايدى. بۇگىن ا. وسمونوۆ اتىنداعى قىرعىز ۇلتتىق كىتاپحاناسىندا قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى رايىمقۇلوۆا قىرعىز رەسپۋبليكاسىنىڭ مادەنيەت، اقپارات، سپورت جانە جاستار ساياساتى ءمينيسترى قايرات يماناليەۆپەن كەزدەستى. وندا باۋىرلاس ەكى مەملەكەت مادەني- گۋمانيتارلىق، سپورت باعىتى بويىنشا كەلىسسوزدەر جۇرگىزدى.
باسقوسۋعا قازاقستاننىڭ قىرعىز رەسپۋبليكاسىنداعى ەلشىسى قايرات نۇرپەيىسوۆ، قىرعىز رەسپۋبليكاسى جوعارعى كەڭەسىنىڭ دەپۋتاتى گۇلشات اسىلبايەۆا، قازاقستانداعى ماناسشى بايانعالي ءالىمجانوۆ جانە ەكى مەملەكەتتىڭ مادەنيەت سالاسىنىڭ باسشىلارى مەن بەلگىلى وكىلدەرى قاتىستى.
كەزدەسۋ بارىسىندا قايرات يماناليەۆ ەكى مەملەكەت اراسىنداعى مادەني بايلانىستى نىعايتۋ مەن دامىتۋ تۇرعىسىندا بىرلەسىپ ءىس-شارالار وتكىزۋگە دايىن ەكەندىگىن، ارىپتەستىك قىزمەتتىڭ بارلىق دەڭگەيىندە قارىم- قاتىناس قىزۋ قولداۋ تاباتىنىن جەتكىزىپ، قوناقتارعا شىعارماشىلىق تابىس تىلەدى. ال ق ر مادەنيەت جانە سپورت ءمينيسترى اقتوتى رايىمقۇلوۆا مادەنيەت جانە سپورت سالاسى بويىنشا بىرلەسىپ قىزمەت اتقارۋعا دايىن ەكەندىگىن، جانە ءىس-شارالاردى ىسكە اسىرۋعا قىزىعۋشىلىق تانىتىپ وتىرعانىن ناقتىلاپ، العىس ءبىلدىردى.
القالى جيىندا كينو ءتۇسىرۋ، تەاتر گوسترولدەرىن، مادەني فورۋمداردى ۇيىمداستىرۋ، قازاقستاننىڭ قىرعىزستانداعى، قىرعىزستاننىڭ قازاقستانداعى مادەنيەت كۇندەرىن، «سارمەردەن» جيىنىن وتكىزۋ جانە دە باسقا ماسەلەلەر قاراستىرىلدى.
ەستەرىڭىزگە سالا كەتەيىك، قىرعىز رەسپۋبليكاسى پرەزيدەنتىنىڭ قازاقستانعا جاساعان رەسمي مەملەكەتتىك ساپارى اياسىندا قازاقستان رەسپۋبليكاسى مادەنيەت جانە سپورت مينيسترلىگى مەن قىرعىز رەسپۋبليكاسى ۇكىمەتىنىڭ جانىنداعى جاستار ءىسى، دەنە شىنىقتىرۋ جانە سپورت جونىندەگى مەملەكەتتىك اگەنتتىگى نۇر-سۇلتان قالاسىندا ۇلتتىق سپورت تۇرلەرى مەن حالىق ويىندارىن دامىتۋ تۋرالى ۆەدومستۆوارالىق كەلىسىمگە قول قويىپ، ءبىرقاتار مادەني ءىس-شارالاردى بىرلەسە وتكىزۋدى ماقۇلداعان بولاتىن.
