ماجىلىستە تۇرعىن ءۇي قۇنىن تومەندەتۋگە قاتىستى ۇسىنىس ايتىلدى

نۇر- سۇلتان. قازاقپارات - ءماجىلىستىڭ جالپى وتىرىسىندا دەپۋتات جامبىل احمەتبەكوۆ قۇرىلىس ماتەريالدارى باعاسىن رەتتەۋگە قاتىستى ۇسىنىس ايتتى، دەپ حابارلايدى قازاقپارات ءتىلشىسى.

ۇكىمەت باسشىسىنىڭ اتىنا جولدانعان دەپۋتاتتىق ساۋالدا قازاقستان رەسپۋبليكاسىنىڭ قۇرىلىس نارىعىندا قۇرىلىس ماتەريالدارىنىڭ جاپپاي قىمباتتاۋى بايقالىپ وتىرعاندىعى، قۇرىلىس ماتەريالدارى قۇنىنىڭ ءوسۋى تۇرعىن ءۇي قۇنىنىڭ قىمباتتاۋىنا اكەپ سوققانى اتالىپ وتكەن. سايكەسىنشە، بۇل مەملەكەتتىك بيۋدجەت ەسەبىنەن سالىناتىن مەكتەپتەر، اۋرۋحانالار جانە باسقا دا الەۋمەتتىك وبەكتىلەر قۇرىلىستارىنىڭ دا قىمباتتاۋىنا الىپ كەلەتىنى بەلگىلى.

ج. احمەتبەكوۆتىڭ ايتۋىنشا، قازىرگى كەزدە قازاقستاندا قۇرىلىس ماۋسىمىنىڭ باستالۋى قارساڭىندا بەلگىلى ءبىر سالالاردا كادرلار تاپشىلىعى قالىپتاستى. قۇرىلىس سالاسىندا كادرلاردىڭ جەتىسپەۋشىلىگى قاتتى سەزىلۋدە، ەڭ الدىمەن، ءارتۇرلى جۇمىسشىلار، تاس قالاۋشىلار، ارلەۋشى- سىرلاۋشىلار جانە ت. ب. ماماندار جەتىسپەيدى. كادر جەتىسپەۋشىلىگىنىڭ نەگىزگى سەبەپتەرىنىڭ ءبىرى قۇرىلىس سالاسى مەن تەحنيكالىق جانە كاسىبي ءبىلىم بەرۋ مەكەمەلەرىنىڭ اراسىنداعى ءوزارا بايلانىستاردىڭ بولماۋىنان بولىپ وتىر.

«كوپتەگەن كوللەدجدەر وقۋشىلاردىڭ كاسىبي باعدارىن شىڭدامايدى، ولارعا وبەكتىلەردە كاسىبي پراكتيكادان ءوتۋ مۇمكىنشىلىكتەرىن جاسامايدى. بۇگىنگى تاڭدا قازاقستان قۇرىلىسشىلار وداعىنىڭ اقپاراتىنا قارايتىن بولساق، ەلىمىزدىڭ قۇرىلىس سالاسىنا 242000 مامان جەتىسپەيدى»، - دەدى دەپۋتات.

وسىعان بايلانىستى، ەڭبەك نارىعىنداعى جەتىسپەۋشىلىكتى تولىقتىرۋ قاجەت جانە جۇمىس بەرۋشىلەرگە قولدا بار كادرلىق پروبلەمالاردىڭ ورنىن تولتىرۋ ءۇشىن قازاقستان رەسپۋبليكاسىنىڭ ۇكىمەتى مىنا ماسەلەلەردى قاراستىرۋى ءتيىس:

- قازاقستاندا تۇرعىن ءۇي قۇنىنىڭ ءوسۋىن تەجەۋ ماقساتىندا قۇرىلىس ماتەريالدارى نارىعىندا باعا بەلگىلەۋدى رەتتەپ وتىرۋ مۇمكىندىكتەرىن ىزدەستىرۋ؛

- قىزمەتكەرلەردىڭ قاعيدالارىنىڭ 5-ساناتىنا «شەتەلدىكتەردىڭ جانە ازاماتتىعى جوق ادامداردىڭ ەرەكشە ساناتى» - تومەن بىلىكتى نەمەسە بىلىكتىلىگى جوق قىزمەتكەرلەر» دەگەن تولىقتىرۋ ەنگىزۋ؛

- جۇمىس بەرۋشىلەرگە قۇرىلىس- مونتاج جۇمىستارىن جۇرگىزۋ كەزەڭىندە شەتەلدىك قىزمەتكەردى قازاقستان اۋماعىندا بولۋ ۋاقىتىن جوبانىڭ مەرزىمىنە سايكەس ۇلعايتۋىنا مۇمكىندىك بەرۋ؛

- پيلوتتىق جوبانى ىسكە اسىرۋ ارقىلى وبەكتىلەردى سالۋ كەزىندە FIDIC قاعيداتتارى مەن ەرەجەلەرىن ەنگىزۋ؛

- تەحنيكالىق جانە كاسىبي ءبىلىم بەرۋ مەكەمەلەرىندەگى وقۋ پروتسەسىنە وندىرىستىك وقۋلاردى ەنگىزۋ جونىندەگى جانە وقۋشىلاردىڭ وندىرىستىك پراكتيكالاردان ءوتۋى مەن ولاردى دۋالدىق وقىتۋ پرينتسيپتەرىمەن تولىقتىرۋ جونىندەگى جۇمىستاردى ۇيلەستىرۋدى قامتاماسىز ەتۋ.

اۆتور: رۋسلان عابباسوۆ