الماتىدا كارانتين رەجيمى كۇشەيتىلەدى

الماتى. قازاقپارات - الماتى كوروناۆيرۋس تارالۋىنا بايلانىستى «قىزىل ايماققا» ءوتتى. وسىعان وراي قالادا كارانتين شارالارى كۇشەيتىلەدى.

بۇل تۋرالى ونلاين بريفينگ بارىسىندا قالالىق سانيتارلىق ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا ايتتى، دەپ حابارلايدى قازاقپارات ءتىلشىسى.

بريفينگ بارىسىندا جۋرناليستەر ناۋرىز مەرەكەسىنە بايلانىستى ەپيدەميولوگيالىق احۋال قالاي وزگەرەتىنىن سۇرادى.

«كەز كەلگەن مەرەكە حالىق اراسىنداعى بايلانىستى ارتتىرادى. ياعني، بۇل اۋرۋ تارالۋىنىڭ كورسەتكىشىن ۇلعايتادى. جۇرتشىلىق ناۋرىز مەرەكەسىن تويلاۋعا دايىندالىپ جاتىر. ال بۇگىننەن باستاپ الماتى ەپيدەميولوگيالىق احۋال ماتريتساسىنىڭ قىزىل ايماعىنا ءوتتى. ەندى جاپپاي بۇقارالىق شارالارعا تىيىم سالىنادى»، - دەدى ءا. قالىقوۆا.

ونىڭ ايتۋىنشا، قالادا شەكتەۋ شارالارى كۇشەيتىلەدى. جاقىندا قالانىڭ باس سانيتارلىق دارىگەرىنىڭ قاۋلىسى جاريالانادى. قازىر قۇجات تالقىلاۋ ساتىسىندا جاتىر.