الەمدەگى كوروناۆيرۋس: قىتاي ۆاكسينا ءتولقۇجاتىن ەنگىزدى، شۆەتسيادا دۇكەن ساتۋشىسىز جۇمىس ىستەيدى

ال پاريج بەن ونىڭ اينالاسىنداعى قالالار كوروناۆيرۋستىڭ جاڭا شتامدارىنىڭ تارالۋىنا توتەپ بەرە الماۋدا.

الايدا بيلىك جەرگىلىكتى لوكداۋن ەنگىزۋگە اسىعار ەمەس، دەپ حابارلايدى قازاقپارات BBC- گە سىلتەمە جاساپ.

دجونس حوپكينس ۋنيۆەرسيتەتىنىڭ مالىمەتى بويىنشا، پاندەميا كەزەڭىندە الەمدە 117,2 ميلليون ادام اۋىرىپ، 2,6 ميلليون ادام قايتىس بولدى.

ا ق ش- تاعى كارانتين العاش رەت جەڭىلدەتىلدى

ەڭ اۋىر ەپيدەميولوگيالىق جاعداي ءالى دە ساقتالىپ وتىرعان ا ق ش- تا ۆاكسينانىڭ ەكى دوزاسىن العان ادامدارعا ءۇي ىشىندە شاعىن توپتارمەن كەزدەسۋگە رۇقسات ەتىلدى. قوعامدىق ورىنداردا ماسكا كيۋ مىندەتتى بولىپ قالا بەرەدى.

بۇل - دجو بايدەن اكىمشىلىگى ماقۇلداعان العاشقى جەڭىلدىك. بۇعان دەيىن ءبىرقاتار مەملەكەت شەكتەۋلەردىڭ كوپ بولىگىن الىپ تاستاعان، ءبىراق شەشىمدەر جەرگىلىكتى دەڭگەيدە قابىلدانعان.

پاريج اۋرۋحانالارىندا بوس ورىن جوق

فرانسيانىڭ دەنساۋلىق ساقتاۋ دەپارتامەنتىنىڭ باسشىسى جەروم سالومون پاريج بەن ونىڭ اينالاسىنداعى اۋرۋحانالار ۆيرۋستىڭ جاڭا شتامدارىنىڭ تارالۋىنا بايلانىستى مۇمكىندىگىنشە قارقىندى جۇمىس جاساپ جاتقاندارىن مالىمدەدى. دەگەنمەن بيلىك وڭىرلىك لوكداۋن ەنگىزبەيدى.

پاريجدە جانە ماڭىنداعى استانالىق وڭىردە فرانسيا حالقىنىڭ التىدان ءبىر بولىگى تۇرادى. دەنساۋلىق ساقتاۋ مينيسترلىگى اۋرۋحانالارعا اۋىر حالدەگى كوۆيد پاتسيەنتتەرىنە ارنالعان ورىندار بوساتۋ ءۇشىن جانە كوبىرەك قىزمەتكەرلەردى تارتۋ ءۇشىن جوسپارلى ەمدەۋ كۋرستارى مەن پروتسەدۋرالارىن %40 عا قىسقارتۋدى بۇيىردى.

شۆەتسيادا دۇكەن ساتۋشىسىز جۇمىس ىستەيدى

شۆەتسيانىڭ اۋىلدىق جەرلەرىندە ازىق-تۇلىك دۇكەندەرى قايتا جانداندى، ولاردىڭ كوپشىلىگى پاندەمياعا بايلانىستى جابىلۋعا ءماجبۇر بولعان ەدى. الايدا ولار ەندى مۇلدەم جاڭا پرينتسيپ بويىنشا جۇمىس ىستەيدى.

ولاردىڭ ساتۋشىلارى جوق جانە جالپى قىزمەت كورسەتەتىن ماماندارى جوق، ال كەيبىر ساۋدا نۇكتەلەرى قۇرىلىس ۆاگونىنداي عانا. تيىسىنشە، اسسورتيمەنت تەك قاجەتتى تاۋارلاردان تۇرادى.

دۇكەنگە تاۋلىگىنە 24 ساعات بويى، كەز كەلگەن ۋاقىتتا دۇكەن يەسىنىڭ ارنايى قوسىمشاسى ارقىلى كىرۋگە بولادى. ءارى قاراي، ساتىپ الۋشى العان زاتتارىنىڭ كودىن سكانەرلەيدى، ال اقشا نەسيە كارتاسىنان الىنادى، ونى الدىمەن تىركەۋ كەرەك.

قىتاي ۆاكسينا ءتولقۇجاتتارىن ەنگىزدى

قىتاي ۆاكتسينا ءتولقۇجاتى دەپ اتالاتىن باعدارلامانى ىسكە قوسقان الەمدەگى العاشقى ەل بولدى. بۇل - ۆاكسينا العان قىتايدىڭ ءاربىر تۇرعىنى ارنايى سيفرلىق پلاتفورمادان جۇكتەپ، شەتەلگە شىعۋعا ۇسىناتىن قۇجات. مۇنداي ءتولقۇجاتتى ەنگىزۋ تۋرالى اڭگىمە الەمنىڭ كوپتەگەن ەلدەرىندە بۇرىننان بەرى ايتىلىپ كەلەدى.

باستامانى جاقتاۋشىلار بۇل حالىقارالىق شەكارالاردى تەزىرەك اشۋعا جانە الەمدىك ەكونوميكانى قالپىنا كەلتىرۋگە كومەكتەسەتىنىنە سەنىمدى.