قارۋلى كۇشتەردىڭ اسكەري بولىمدەرى كەنەتتەن بەرىلگەن دابىلمەن كوتەرىلدى

نۇر- سۇلتان. قازاقپارات - وتكەن تۇندە شىمكەنت پەن سارى وزەكتە ورنالاسقان قۇرلىق اسكەرلەرىنىڭ اسكەري بولىمدەرى وقۋ- جاتتىعۋ دابىلىن قاعىپ، جاۋىنگەرلىك دايارلىققا كەلتىرىلدى.

ءىس- شارا قازاقستان رەسپۋبليكاسى قارۋلى كۇشتەردىڭ اسكەري بولىمدەرىنىڭ جاۋىنگەرلىك دايارلىعىن قاۋىرت تەكسەرۋ شەڭبەرىندە وتكىزىلۋدە، دەپ حابارلادى قورعانىس مينيسترلىگىنىڭ باسپا ءسوز قىزمەتى.

ءبولىم كومانديرلەرى جامبىل وبلىسىنداعى «ءماتىبۇلاق» جالپى اسكەري پوليگونىنا باعىنىستى بولىمشەلەردى جىبەرۋگە جاۋىنگەرلىك تاپسىرما الدى. اسكەري قىزمەتشىلەر اسكەري ماشينالاردا بەلگىلەنگەن اۋدانعا بىرنەشە ءجۇز كيلومەتر مارش جاسادى. اۋىر شىنجىر تاباندى بروندى تەحنيكا تەمىرجول كولىگىمەن جانە كولىك تارتقىشتارمەن تاسىمالدانادى. بەلگىلەنگەن اۋدانعا كەلگەننەن كەيىن بولىمشەلەر جابدىقتالىپ، ودان ءارى ءىس- قيمىل جاساۋعا ازىرلەنىپ، قورعانىس پوزيتسيالارىنا ورنالاسادى. اسكەرلەردىڭ ءىس- قيمىل جوسپارىنا سايكەس بەلگىلەنگەن اۋدانعا كەلگەن كەزدە ينجەنەرلىك قۇرالدارىن قۇرىپ، بەكىنىستەردى بۇركەمەلەۋ جانە ودان ءارى وقۋ- جاۋىنگەرلىك مىندەتتەردى اتقارۋعا ازىرلىك بويىنشا ءىس- شارالار اتقارۋلارى قاجەت.

www.24.kz