الماتىدا ءۇندىستاندىق «بولليۆۋد» كينوستۋدياسى كومەديا ءتۇسىرىپ جاتىر
«Gaalipata-2» دەپ اتالاتىن تۋىندى ەلدە بۇعان دەيىن دە تۇسىرىلگەن ەدى. ەكى جاستىڭ اراسىنداعى ماحاببات جايلى كينونىڭ ءتۇسىرىلىمىن ءبىزدىڭ تىلشىلەرىمىز كورىپ قايتتى.
- «Gaalipata-2» دەپ اتالاتىن فيلمدە ءان مەن بي كوپ. ءۇندى فيلمىنىڭ ەرەكشەلگى دە سوندا. تۇسىرىلىمگە الماتىلىق بيشىلەر توبى دا قاتىسىپ جاتىر. رومانتيكالىق كومەديانىڭ العاشقى ءبولىمى 2008 -جىلى تۇسىرىلگەن بولاتىن. ءبىراق ەكىنشى بولىمىندە كورىنىستەردىڭ كوبى جەتىسۋدىڭ اسەم جەرلەرىندە تۇسىرىلگەن.
يوگارادج بحات، «Gaalipata-2» فيلمىنىڭ رەجيسسەرى:
- ءار كارتينانى تۇسىرگەندە مەن تابيعاتى كورىكتى جەرلەردى تاڭداۋعا تىرىسامىن. ال قازاقستاننىڭ تابيعاتى تاماشا. تاۋ مەن دالاسى، كولى مەن ءشولى ۇلاسىپ جاتىر. جانە ءبىر- بىرىنە جاقىن.
بالا كەزدەن بىرگە وسكەن دوستار - گانەش، ديگانت پەن كيتتي - ءبارى بىردەي ءبىر ارۋعا عاشىق بولىپ قالادى. وقيعا ءۇندىستاندا باستالىپ، قازاقستاندا جالعاسادى. كينونىڭ ءتۇسىرىلىمى شارىن شاتقالىندا، شىمبۇلاقتا، 28-پانفيلوۆشىلار ساياباعىندا ءوتتى.
گانەش، اكتەر:
- فيلمنىڭ رەجيسسەرى مەنىڭ جاقىن دوسىم. باستى رولگە تۇسۋگە ۇسىنىس جاساعاندا كەلىستىم. بۇعان قوسا، رومانتيكالىق فيلمدەرگە ءجيى تۇسكەن ەدىم. ال ءبىزدىڭ ەلدە شىعاتىن كارتينالار نەگىزىنەن ماحاببات جايلى.
ۆايبحاۆي شانديليا، اكتريسا:
- كينوعا بالا كەزدەن تۇسەمىن. قازاقستانعا العاش رەت كەلۋىم. كەرەمەت اسەر الدىم. اسىرەسە، تابيعاتى ۇنادى. كولسايدى ەشقاشان ۇمىتپايمىن.
ەلىمىزدەگى «بولليۆۋد» فيلمىنىڭ تۇسىرىلىمىنە قازاقستاندىق كينو ماماندارى دا كومەكتەسىپ جاتىر. پروديۋسەر مايرا قارساقبايەۆانىڭ ايتۋىنشا، بۇعان دەيىن دە ۇندىستاندىقتارمەن بىرلەسىپ فيلم تۇسىرگەن.
مايرا قارساقبايەۆا، پروديۋسسەر:
- نەگىزىنەن ءبىز شىمبۇلاق، كولساي، ەڭ جاقسى بەتكە ۇستار جەرلەردى كورسەتىپ جاتىرمىز. ءبىر جاقسى جەرى - بۇل تۋريزمنىڭ دامۋىنا وتە ءوزىنىڭ ۇلەسىن قوسىپ جاتىر. مىسالعا جۇلدىزداردىڭ ءبىر وقىرماندارى 1 ميلليون بولسا، ءبىر كۇندە ولار 1 ميلليون كوردى دەسە بولادى. ولاردىڭ ءبارى قىزىعىپ «كولساي قايدا، شىمبۇلاق قايدا» دەپ مەنەن سۇراپ جاتىر.
«Gaalipata-2» رومانتيكالىق كومەدياسى ءالى تولىق ءتۇسىرىلىپ بولعان جوق. ول تەك كۇزگە تاياۋ ەكرانعا شىعادى.
www.24.kz
