وزبەكستاننىڭ نامانگان قالاسىنان تابىلعان قوجا احمەت ياساۋيدىڭ ءمورى قازاقشاعا اۋدارىلدى
بۇل تۋرالى تۇركىستانداعى «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ماماندارى مالىمدەدى، دەپ حابارلايدى قازاقپارات ءتىلشىسى.
اتالعان مۋزەيدىڭ عىلىم ءبولىمىنىڭ باسشىسى بەرىك بايبولوۆتىڭ ايتۋىنشا، اۋدارما كەزىندە مەتالدان جاسالعان موردە تىڭ دەرەكتەر جازىلعانى انىقتالعان. مامانداردىڭ سوزىنشە، بۇعان دەيىن تابىلعان قوجا احمەت ياساۋيدىڭ مورلەرى تەك قاعاز كۇيىندە ساقتالعان. ال، بۇل ءمور مىستان جاسالعان. ءارى العاش رەت تابىلىپ وتىر. شاعاتاي تىلىندە جازىلعان جازبالار اۋدارىلىپ، قاي عاسىرعا تيەسىلى ەكەنى دە انىق بولعان.
«مۇنداي ءمور جالپى ايتقاندا ورتا ازيادا ەشكىمدە كەزدەسپەيدى. وسى يبراھيم اقساقالدىڭ قولىندا قازىر ساقتالىپ تۇرعان ەكەن. ءبىزدىڭ تۇركىستاندىق ساقتالعان مورلەردە ون احمەتتىڭ اتى جازىلادى دا، ال كەشەگى قاريانىڭ قولىنان تابىلعان ءموردى ءبىز قازىر اۋداردىق. وندا بىزگە بەيمالىم ءۇش شەيحتىڭ اتى بەلگىلى بولدى. ول احمەت ىسقاق، احمەت جارجاني، احمەت مارجاني دەگەن. 14-15- عاسىرعا تيەسىلى ەكەنى ايدان انىق»، - دەيدى بەرىك بايبولوۆ.
ايتا كەتەيىك، بۇعان دەيىن وزبەكستاننىڭ نامانگان قالاسىنان قوجا احمەت ياساۋي شەجىرەسىنىڭ ءبىر نۇسقاسى مەن ءمورى تابىلعان بولاتىن. يسلام الەمىنە ايگىلى شايىقتاردىڭ ەسىمى جازىلعان قۇندى مۇرالاردى ياساۋيدىڭ ۇرپاعى يبراھيمجان شاريفحۋجايەۆ قاجى ساقتاپ كەلگەن.
98 جاستاعى قاريانى تۇركىستانداعى «ازىرەت سۇلتان» مەملەكەتتىك تايحي-مادەني قورىق-مۋزەيىنىڭ قىزمەتكەرلەرى وزبەكستانعا ارنايى ىزدەپ باردى.
جاسى ءبىر عاسىرعا تاياعان اقساقال مۋزەي قىزمەتكەرلەرىنە اتا-بابالارىنان جەتكەن ناسابناما قولجازباسىن دا كورسەتتى. شاعاتاي تىلىندە جازىلعان ەكى جارىم مەترلىك قولجازبانى دا ماماندار سۋرەتكە ءتۇسىرىپ الىپ، الداعى ۋاقىتتا زەرتتەمەك.
ال، عۇلاما عالىم يبراحيمجان اقساقالدىڭ قولىنداعى ناسابناما شەجىرەسى مەن ءمورىن جاز ماۋسىمىنا تاياۋ تۇركىستانداعى مۇراجايعا تابىستاماق. جالپى، مۋزەي باسشىلىعى قوجا احمەت ياساۋيدىڭ قالدىرعان مۇراسى ءالى كۇنگە تولىق زەرتتەلىپ بىتپەگەنىن ايتادى.
ازىرگە تەك 70 تەن اسا شەجىرەسىنىڭ ءتۇرى تابىلعان. سوندىقتان «ياساۋي ىزىمەن» عىلىمي تانىمدىق ەكسپەديتسيا اياسىندا ءالى دە جۇمىستار ورتا ازيا ەلدەرى اۋماعىندا جالعاسادى دەپ وتىر.
وسىعان دەيىن نامانگاننان قوجا احمەت ياساۋي شەجىرەسىنىڭ ءبىر ۇلگىسى مەن ءمورى تابىلعانىن جازعان ەدىك.
