تۇركىستان وبلىسىنىڭ دەنساۋلىق ساقتاۋ سالاسى رەسپۋبليكادا كوش باستادى

تۇركىستان. قازاقپارات - تۇركىستان وبلىسىنىڭ دەنساۋلىق ساقتاۋ سالاسى ەلىمىز بويىنشا كوش باستادى.

پاندەميا كەزىندە ورىن العان قيىندىقتارعا قاراماستان، قوعامدىق دەنساۋلىق باسقارماسى مەملەكەتتىك باعدارلامالار كورسەتكىشى بويىنشا اۋقىمدى جۇمىس اتقارعان، دەپ حابارلايدى قازاقپارات ءتىلشىسى.

پرەمەر-ءمينيستردىڭ ورىنباسارى ەرالى توعجانوۆتىڭ قاتىسۋىمەن وتكەن دەنساۋلىق ساقتاۋ مينيسترلىگىنىڭ كەڭەيتىلگەن القا وتىرىسىندا بىلتىر اتقارىلعان جۇمىس قورىتىندىسى مەن بيىلعا ارنالعان مىندەتتەر ءمالىم بولدى.

ماسەلەن، تۇركىستان وبلىسىنىڭ دەنساۋلىق ساقتاۋ سالاسىنا 13,7 ميلليارد تەڭگە بولىنگەن بولسا، 2020-جىلعا ارنالعان مەملەكەتتىك باعدارلامالار ءتورت نىسانالى ينديكاتورعا باعىتتالعان.

ولار ازاماتتاردىڭ ورتاشا ءومىر ءسۇرۋ ۇزاقتىعىن 73,21 جاسقا دەيىن ارتتىرۋ مەن جۇرەك-قان تامىرى، ونكولوگيالىق، سوزىلمالى رەسپيراتورلىق اۋرۋلاردان جانە قانت ديابەتىنەن مەزگىلسىز قايتىس بولعاندار سانىن %18,86 عا دەيىن تومەندەتۋگە جۇمسالعان.

سونداي-اق، انا ءولىمىن %17,1 عا دەيىن ازايتۋ، 1 مىڭ ءتىرى تۋعانعا شاققانداعى نارەستە ءولىمىن %10,1 دەيىن تومەندەتۋ كوزدەلگەن.

وسىلايشا وبلىس اكىمى ءومىرزاق شوكەيەۆتىڭ قولداۋىمەن وڭىردەگى مەديتسينا سالاسىن دامىتۋعا بارىنشا كۇش سالىنعان.

تۇركىستان وبلىستىق قوعامدىق دەنساۋلىق باسقارماسى باسشىسى مارات پاشيموۆتىڭ ايتۋىنشا، ەڭ ءبىرىنشى كەزەكتە انا مەن بالا ساۋلىعى، جانساقتاۋ جانە وتا جاساۋ مەن جەدەل جاردەم قىزمەتىن كۇشەيتۋگە باسىمدىق بەرىلگەن. مەديتسينالىق ۇيىمداردىڭ ماتەريالدىق-تەحنيكالىق بازاسىن جابدىقتاۋ ماقساتىندا 2,5 ميلليارد تەڭگەگە 205 دانا مەديتسينالىق تەحنيكا ساتىپ الىنعان.

مەملەكەتتىك-جەكەمەنشىك ارىپتەستىك تەتىگى ارقىلى 9 فەلدشەرلىك امبۋلاتوريانىڭ قۇرىلىسى جۇرگىزىلىپ، ونىڭ 5 ءۋى پايدالانۋعا بەرىلگەن. سونىمەن قاتار بيىل ءتورت ەمدەۋ نىسانى اشىلماق.

وڭىردە %73 مەديتسينالىق ۇيىمدار مەديتسينالىق اقپاراتتىق جۇيەسىنە قوسىلعان. قازىرگى تاڭدا وبلىس بويىنشا 2 مەديتسينالىق اقپارات جۇيەسى (دامۋمەد، كومەك) جۇمىس جاساۋدا.

وبلىس بويىنشا دارىگەر مەن ورتا بۋىندى مەديتسينالىق قىزمەتكەرلەردىڭ جۇمىس ورنىن كومپيۋتەرلىك تەحنيكامەن جابدىقتاۋ ۇلەسى - %100. ايتا كەتەيىك، وبلىس بويىنشا تولىقتاي ەلەكتروندىق دەنساۋلىق پاسپورتتارى جاساقتالعان. 400 مىڭعا جۋىق ادام ءموبيلدى قوسىمشاسىن پايدالانادى. جىل سوڭىندا 10,5 مىڭنان استام تۇركىستاندىق دارىگەردىڭ قابىلداۋىنا جازىلعان.