تۇركىستان دۇنيەجۇزىلىك مۇرا قالالارى ۇيىمىنا رەسمي تۇردە قابىلداندى

تۇركىستان. قازاقپارات - تۇركىستان شاھارى دۇنيەجۇزىلىك مۇرا قالالارى ۇيىمىنا (د م ق ۇ) رەسمي تۇردە قابىلداندى.

بۇل تۋرالى قالا اكىمدىگى رەسمي مالىمەت تاراتتى، دەپ حابارلايدى قازاقپارات ءتىلشىسى.

اتالعان ۇيىمعا مۇشە بولۋ ارقىلى قوجا احمەت ياساۋي كەسەنەسى ەندى تۋريستەردىڭ قىزىعۋشىلىعىن ودان سايىن ارتتىرا تۇسپەك. سونداي-اق، كۇن سايىن كوركەيىپ كەلە جاتقان شاھاردىڭ قالا ستاتۋسىن ارتتىرىپ، جەرگىلىكتى تۇرعىندارعا ەرەكشە قۋانىش سىيلايدى.

وسى ماقساتتا 2- ءساۋىر كۇنى تۇركىستان قالاسىندا ەۋرازيانىڭ دۇنيەجۇزىلىك مۇراسى قالالارىنىڭ X حالىقارالىق كونفەرەنسياسى وتەدى. بۇل كونفەرەنسيا دۇنيەجۇزىلىك مۇرا قالالارى ۇيىمىنىڭ (د م ق ۇ) سەرىكتەستىگى شەڭبەرىندە ۇيىمداستىرىلماق.

ايتا كەتەيىك، اتالعان ۇيىم 1993-جىلى 8- قىركۇيەكتە فەس قالاسىندا (ماروككو) قۇرىلعان بولاتىن. ۇيىم - دۇنيەجۇزىلىك مۇرا وبەكتىسىن قالالىق باسقارۋعا قاتىستى بارلىق ماسەلەلەر بويىنشا ۇجىمدىق كەڭەس.

ءوز اۋماعىندا يۋنەسكونىڭ بۇكىل الەمدىك مۇرا تىزىمىنە ەنگىزىلگەن 300 دەن استام قالامەن بايلانىسادى. بۇل قالالاردىڭ بارلىعىندا جالپى 164 ميلليوننان استام ادام تۇرادى.