ماجىلىستە باننەر ءماتىنىن قاتەسىز جازۋعا قاتىستى قۇجات ماقۇلداندى

نۇر-سۇلتان. قازاقپارات - پارامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كورنەكى اقپارات ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى، دەپ حابارلايدى قازاقپارات ءتىلشىسى.

اتالعان زاڭ جوباسىن قابىلداۋدىڭ ماقساتى - قازاقستان رەسپۋبليكاسىنىڭ كەيبىر زاڭنامالىق اكتىلەرىن كورنەكى اقپارات ماسەلەلەرى بويىنشا جەتىلدىرۋ.

زاڭ جوباسىنىڭ نەگىزگى باعىتتارى:

1. دەرەكتەمەلەر مەن كورنەكى اقپارات ماتىندەرىن ورفوگرافيا نورمالارىنا سايكەس جازۋ؛

2. دەرەكتەمەلەر مەن كورنەكى اقپارات ماتىندەرىنىڭ تەڭتۇپنۇسقالى اۋدارماسىن (اۋتەنتيچنوست) ساقتاپ وتىرىپ جازۋ؛

3. «ءماتىننىڭ تەڭتۇپنۇسقالى اۋدارماسى» دەگەن ۇعىم ەنگىزۋ. «كورنەكى اقپارات قۇرالدارى (باننەرلەر، ماڭدايشالار، حابارلاندىرۋلار، جارناما، باعا كورسەتكىشتەرى جانە ت. ب. ) ەلدەگى قوعامدىق- ساياسي، الەۋمەتتىك- ەكونوميكالىق جاعدايعا اسەر ەتەتىن ماڭىزدى قۇرالدار بولىپ سانالادى. دەرەكتەمەلەر مەن كورنەكى اقپارات ماتىندەرىن ورفوگرافيا نورمالارىنا سايكەس جازۋ تالابى قازاق تىلىندەگى ماتىندەردىڭ ساپاسىز جازىلۋىنا، ورفوگرافيالىق قاتەلەرگە جول بەرمەۋگە باعىتتالعان. دەرەكتەمەلەر مەن كورنەكى اقپارات ماتىندەرىنىڭ تەڭتۇپنۇسقالى اۋدارماسىن ساقتاپ وتىرىپ جازۋ تالابى قوعامدا ەكى تىلدە (قازاق جانە ورىس تىلدەرىندەگى) بەرىلگەن ماتىندەردىڭ ماعىنالىق، مازمۇندىق جاعىنان سايكەس كەلمەۋى فاكتىلەرىن جويۋعا باعىتتالىپ وتىر»، - دەدى ق ر مادەنيەت جانە سپورت ءمينيسترى اقتوتى رايىمقۇلوۆا.

ونىڭ ايتۋىنشا، كورنەكى اقپاراتتى اشىق كەڭىستىكتە جانە عيماراتتار ىشىندە زاڭنامادا بەلگىلەنگەن تارتىپپەن مەملەكەتتىك ورگاندارمەن قاتار كەز كەلگەن كاسىپكەرلىك سۋبەكتىلەرى جۇزەگە اسىرا الادى. كاسىپكەرلىك سۋبەكتىلەرى كورنەكى اقپاراتتى ءوز ءونىمى مەن قىزمەتىن ىلگەرىلەتۋ قۇرالى رەتىندە پايدالانادى.

«مەملەكەتتىك ورگاندارعا ازاماتتاردان كورنەكى اقپاراتتى ورنالاستىرۋ كەزىندە ءتىل تۋرالى زاڭناما تالاپتارىنىڭ بۇزىلۋىنا بايلانىستى شاعىمداردىڭ كوپتەپ ءتۇسۋى ورىن الۋدا. وسى ورايدا مەملەكەتتىك تىلدەگى كورنەكى اقپاراتتىڭ بولماۋىن ازاماتتار قازاقستان رەسپۋبليكاسى كونستيتۋتسياسىنىڭ 14-بابىندا بەكىتىلگەن ءوز قۇقىقتارىنا قىسىم جاساۋ دەپ سانايدى. كورنەكى اقپاراتقا قاتىستى زاڭ بۇزۋشىلىقتار بويىنشا مەملەكەتتىك ورگاندارعا 2018 -جىلى - 12886 ءوتىنىش، 2019 -جىلى 12900 ءوتىنىش كەلىپ تۇسكەن. 2020 -جىلى كورنەكى اقپاراتتار بويىنشا جەدەل جەلىگە (call center) كەلىپ تۇسكەن شاعىمدار سانى – 3442 نى قۇراعان»، - دەدى مينيستر.

اتالعان پروبلەمالاردى شەشۋ ماقساتىندا زاڭ جوباسى اياسىندا قازاقستان رەسپۋبليكاسىنىڭ 13 زاڭنامالىق اكتىسىنە تۇزەتۋلەر ەنگىزۋ كوزدەلىپ وتىر. كۇتىلەتىن ناتيجە:

- مەملەكەتتىك ءتىلدىڭ كورنەكى اقپاراتتا مىندەتتى تۇردە قولدانىلۋىن قامتاماسىز ەتۋ؛

- دەرەكتەمەلەر مەن كورنەكى اقپارات ماتىندەرىن ورفوگرافيا نورمالارىنا سايكەس جازۋدى قامتاماسىز ەتۋ؛ - ماتىندەردىڭ ەكى تىلدە تەڭتۇپنۇسقالىلىعىن ساقتاپ جازۋدى قامتاماسىز ەتۋ.

«زاڭ جوباسىن قابىلداۋ ەلىمىزدەگى ءتىل ساياساتىن ءتيىمدى ىسكە اسىرۋعا ىقپال ەتەتىن بولادى، تەرىس قۇقىقتىق جانە الەۋمەتتىك- ەكونوميكالىق سالدارعا اكەپ سوقتىرمايدى»، - دەدى ا. رايىمقۇلوۆا.