قازاقستاندا فرانسۋز تەحنولوگياسى بويىنشا ەشكى ىرىمشىگى ءوندىرىسى اشىلادى
كەلىسسوزدەر بارىسىندا فرانسۋز كاسىپكەرى جەرگىلىكتى شيكىزات پەن جۇمىس كۇشىن پايدالانا وتىرىپ، الماتى وبلىسىندا ەشكى سۇتىنەن ىرىمشىك ءوندىرىسىن اشۋ تۋرالى جوسپارلارىمەن ءبولىستى، دەپ حابارلايدى قازاقپارات ق ر سىرتقى ىستەر مينيسترلىگىنىڭ رەسمي سايتىنا سىلتەمە جاساپ.
وندىرىسكە باستاپقى ينۆەستيتسيالاردىڭ كولەمى 1 ميلليون ەۋرونى قۇرايدى. جوبانى قارجىلاندىرۋعا «Kairos Advice» حالىقارالىق ينۆەستيتسيالىق- كونسالتينگتىك كومپانياسىنىڭ باس ديرەكتورى ايگۇل ساينوۆا دا قاتىسادى.
ءوندىرىستى دامىتۋ ءۇشىن فرانسيادان اسىل تۇقىمدى مال يمپورتى، سونداي- اق تەحنولوگيالار ترانسفەرى مەن تاجىريبەمەن ءبولىسۋ كوزدەلەدى. ەلشى بۇل جوبا قازاقستان مەن فرانسيا اراسىنداعى ىنتىماقتاستىقتىڭ باسىم سالالارىنىڭ ءبىرى بولىپ تابىلاتىن اۋىل شارۋاشىلىعىنا سايكەس كەلەتىنىن اتاپ ءوتتى.
ونىڭ ايتۋىنشا، ەشكى سۇتىنەن جاسالعان ىرىمشىكتىڭ ە ا ە و، ق ح ر جانە ورتالىق ازيا ەلدەرىنىڭ نارىقتارىنا جەتكىزۋدىڭ ەلەۋلى الەۋەتى بار.
كەزدەسۋ قورىتىندىسى بويىنشا فرانسۋز ينۆەستورى قازاقستان ەلشىلىگىنە قولداۋ كورسەتكەنى ءۇشىن العىسىن ءبىلدىردى. فرانسۋز ينۆەستورى الداعى ۋاقىتتا جوبانى باستاپ، ەشكى ىرىمشىگىنىڭ العاشقى پارتياسىن تۇتىنۋشىلارعا ۇسىنۋ ءۇشىن قازاقستانعا بارۋدى كوزدەپ وتىر.
