استانادا العاش رەت قۇرىلىس كراندارى شىعارىلا باستادى
«قاراپايىم زاتتار ەكونوميكاسى» جوباسى اياسىندا ەلوردادا العاش رەت قۇرىلىس كراندارىن ءوزىمىز شىعارا باستادىق. بۇرىن مۇنارالى قۇرىلىس كراندارى شەتەلدەن اكەلىنەتىن، ولاردى تاسىمالداۋ قىمباتقا تۇسەتىن. بۇگىن ەلورداداعى العاشقى كران جاسالعان سەحقا باردىق. قۇرىلىستىڭ باستى درايۆەر ەكەنىن ەسكەرسەك، وتاندىق ماتەريالدار ءوندىرۋ ءبىز ءۇشىن وتە ماڭىزدى. بىلتىر 3 ميلليون شارشى مەتر تۇرعىن ءۇي سالىپ، پايدالانۋعا بەردىك. ايتالىق، 7 مىڭنان استام الەۋمەتتىك پاتەر سالدىق، بيىل بۇل كورسەتكىشتى ودان دا ارتتىرامىز. بۇل سالادا دا ءوندىرىستى قولدايتىن بولامىز»، - دەدى اكىم.
ا. كولگىنوۆ ءمالىم ەتكەندەي، العاشقى قۇرىلىس كراندارىن «لاشىن فاكتوري» ج ش س كومپانياسى شىعارا باستادى. بۇل كومپانيا «استانا - جاڭا قالا» اەا مۇشەسى، №1 يندۋستريالىق پاركتە ورنالاسقان. كاسىپورىندا وتاندىق ليفتىلەر دە شىعارىلادى. ليفتىلەر ەكسپو كەزىندە قولدانىلىپ، مەملەكەتتىك باعدارلامالار بويىنشا سالىنعان تۇرعىن ءۇي كەشەندەرىنە ورناتىلعان.
«مەملەكەت باسشىسىنىڭ تاپسىرماسىنا سايكەس، ينۆەستورلارعا قولايلى جاعداي جاساپ، ينۆەستيتسيالىق احۋالدى جاقسارتۋ ءۇشىن جۇمىس ىستەيمىز. پاندەمياعا قاراماستان، بىلتىردىڭ وزىندە 1 تريلليون تەڭگەدەن استام جەكە ينۆەستيتسيالاردى تارتۋ مۇمكىن بولدى. 111 ينۆەستيتسيالىق جوبا قولداۋ تاپتى. ءبىرىنشى كەزەكتە - قالا تۇرعىندارى مەن قالاعا قاجەت جوبالاردى قولدايمىز. ولاردىڭ قاتارىنا - ونەركاسىپ، لوگيستيكا، ساۋدا جانە ت. ب. سالالارداعى الەۋمەتتىك نىساندار كىرەدى»، - دەدى قالا باسشىسى.
