ۆاكسينالار قالاي ساقتالادى - باسقارما جاۋابى

نۇر-سۇلتان. قازاقپارات - ەلوردانىڭ قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆا ۆاكسينالاردى تاسىمالداۋ جانە ساقتاۋ ەرەجەلەرىن باياندادى، دەپ حابارلايدى قازاقپارات ءتىلشىسى.

ونىڭ ايتۋىنشا، باسقارما قويماسىندا ءبىر ۋاقىتتا 200 مىڭعا جۋىق ۆاكسينا دوزاسىن ساقتاۋعا بولاتىن ءتورت مۇزداتقىش قوندىرعى بار.

«ۆاكسينانىڭ ءوزى س ق- فارماتسيا حابىنان اۆتورەفريجەراتورلاردا مينۋس 18-20 گرادۋستا جەتكىزىلەدى. جەتكىزۋدىڭ بارلىق كەزەڭدەرىندە سۋىق تەمپەراتۋرا ساقتالادى. ءارى قاراي، وسى ۆاكسينالاردى بارلىق ستاندارتتارعا سايكەس قويماعا قابىلدايمىز. العاشقى مەديتسينالىق- سانيتاريالىق كومەك ۇيىمدارىنا ۆاكسينا تەرموكونتەينەرلەردە جەتكىزىلەدى، ولاردا تەرموتىركەگىشتەر نەمەسە تەرموينديكاتورلار بولادى. سولار ارقىلى تاسىمالداۋدىڭ بارلىق كەزەڭدەرىندە تەمپەراتۋرالىق رەجيمنىڭ ساقتالۋىن تەكسەرەمىز»، - دەپ ءتۇسىندىردى سپيكەر نۇر-سۇلتان قالاسىنىڭ اكىمدىگىندە وتكەن ونلاين بريفيرنگىندە.

ءاربىر مەديتسينالىق ۇيىمدا ۆاكسينانىڭ ساقتالۋى مەن تاسىمالدانۋىنا جاۋاپ بەرەتىن، ارنايى وقىتۋدان وتكەن مەديتسينا قىزمەتكەرى بەكىتىلگەن.

«ولار تاۋلىگىنە ەكى رەت - تاڭەرتەڭ جانە كەشكە توڭازىتقىش جابدىعىنىڭ تەمپەراتۋراسىن تەكسەرەدى جانە مۇنىڭ بارلىعى تەمپەراتۋرانى ەسەپكە الۋ جۋرنالىنا جازىلادى. ەگەر تەرموداتچيكتەر تاسىمالداۋ شارتتارى بۇزىلعانىن انىقتاسا، ناقتى شارالار قابىلداناتىن بولادى»، - دەيدى ءا. رۇستەموۆا.

ايتا كەتەيىك، ەلوردامىزدا ۆاكسيناتسيالاۋدىڭ ءۇشىنشى اپتاسى اياقتالدى. ۆاكسينالاۋ ەمحانالار، ينفەكسيالىق ستاتسيونارلار، جەدەل مەديتسينالىق جاردەم، العاشقى مەديتسينالىق سانيتارلىق كومەك ۇيىمدارى، كوپبەيىندى ستاتسيونارلاردىڭ قابىلداۋ بولىمدەرىنىڭ مەديتسينا قىزمەتكەرلەرىنە وتكىزىلۋدە. ءتيىستى كونتينگەنت ىشىندە 6300 ادامنىڭ 1980 ى ۆاكسينا الدى. ولاردىڭ اراسىندا اسقىنۋ انىقتالعان جوق. سونىمەن بىرگە، ءاليا رۇستەموۆا «شەت ەلدە Pfizer نەمەسە Moderna ۆاكسينالارى سالىنسا ، قازاقستاندا قابىلدانا ما؟» دەگەن سۇراققا جاۋاپ بەردى.