13:17, 19 - اقپان 2021 | GMT +5
ۇكىمەت: قارجى مينيسترلىگىنە زاڭسىز ساۋدامەن كۇرەس بويىنشا تاپسىرما بەرىلدى
نۇر-سۇلتان. قازاقپارات - بۇگىن ق ر قارجى مينيسترلىگىنىڭ القا ماجىلىسىندە ق ر پرەمەر- ءمينيسترىنىڭ ءبىرىنشى ورىنباسارى ءاليحان سمايىلوۆ زاڭسىز ساۋدا اينالىمىنا توسقاۋىل قويۋعا قاتىستى تاپسىرما بەردى، دەپ حابارلايدى قازاقپارات ءتىلشىسى.
«قارجى مينيسترلىگى الدىندا باسىمدىقتى ترانزيتتىك باعىتتار بويىنشا كەدەن بەكەتتەرىن جاڭعىرتۋ مەن اۆتوماتتاندىرۋ، سونداي- اق كەدەندىك راسىمدەۋ ۋاقىتىن 5 ەسەگە قىسقارتۋ مىندەتى تۇر»، - دەدى ءا. سمايىلوۆ.
سونىمەن قاتار ول شەكارادا زاڭسىز تاۋار اينالىمىنا توسقاۋىل قويۋعا قاتىستى تاپسىرما بەردى. «قارجى مينيسترلىگى مۇددەلى مەملەكەتتىك ورگاندارمەن جانە «اتامەكەن» ۇ ك پ- مەن بىرلەسە ناۋرىز ايىنىڭ سوڭىنا دەيىن شەكارادا زاڭسىز ساۋدا اينالىمىنا قارسى ءىس- قيمىل كەشەندى جوسپارى بويىنشا قادامداردى ازىرلەپ، ۇكىمەتتىڭ قاراۋىنا ەنگىزۋى كەرەك»، - دەدى ۇكىمەت باسشىسىنىڭ ورىنباسارى. بۇدان بۇرىن حابارلانعانداي، القا ماجىلىسىندە ءاليحان سمايىلوۆ جەكەشەلەندىرۋ جوسپارىنا بايلانىستى مينيسترلىككە تاپسىرما بەرگەن بولاتىن.
اۆتور: رۋسلان عابباسوۆ
