سالىق زيمانوۆ زاڭ عىلىمدارى دوكتورى دارەجەسىن العان العاشقى قازاق - ەرالى توعجانوۆ

نۇر-سۇلتان. قازاقپارات - سالىق زيمانوۆ - قازاقتىڭ بيلەر سوتىنىڭ تەڭدەسى جوق ينستيتۋت ەكەنىن دالەلدەگەن عالىم.

بۇل تۋرالى ق ر پرەمەر- ءمينيسترىنىڭ ورىنباسارى ەرالى توعجانوۆ ق ر ۇ ع ا اكادەميگى، زاڭ عىلىمدارىنىڭ دوكتورى، پروفەسسور زيمانوۆ سالىق زيمان ۇلىنىڭ 100 جىلدىعىنا ارنالعان رەسپۋبليكالىق عىلىمي- تاجىريبەلىك كونفەرەنسيادا ايتتى، دەپ حابارلايدى قازاقپارات ءتىلشىسى. «مەن سالىق زيمانوۆتىڭ تىكەلەي شاكىرتىمىن. ونىڭ قولاستىندا قىزمەت ىستەدىم. قازاقتا «اكەنىڭ بالاسى ەمەس، حالىقتىڭ بالاسى بول» دەگەن اق تىلەك بار. سالىق زيمانوۆتىڭ ءومىر جولى وسى تىلەكتىڭ ناقتى دالەلى. 1921 -جىلى ومىرگە كەلىپ، حالقى مەن تۋعان جەرىنىڭ باسىنا تۇسكەن بارلىق قيىنشىلىقتى ءوز باسىنان وتكىزگەن قازاقتىڭ ءبىرتۋار ۇلى مەكتەپتە اسا ۇقىپتىلىقپەن وقىپ، ەڭبەك جولىن مۇعالىم بولۋدان باستاعان. سوعىستا حالقى مەن وتانى ءۇشىن ايانباي ەرلىك كورسەتىپ، گۆارديا پولكوۆنيگى شەنىن العان. بەيبىت ومىرگە ورالعان جاس جىگىتتىڭ جولىندا قانىش ساتبايەۆ سياقتى ۇلى عالىم كەزدەسىپ، 1948 -جىلدان باستاپ عىلىم جولىنا اياق باسقان»، - دەيدى ق ر پرەمەر-ءمينيسترىنىڭ ورىنباسارى ەرالى توعجانوۆ.

ونىڭ ايتۋىنشا، سالىق زيمانوۆ 29 جاسىندا ماسكەۋدە ك س ر و عىلىم اكادەمياسىنىڭ قۇقىق ينستيتۋتىندا «زاڭ عىلىمدارى كانديداتى» عىلىم دارەجەسىن، 40 جاسىندا «زاڭ عىلىمدارىنىڭ دوكتورى» عىلىمي دارەجەسىن قورعاعان.

«ول ۇلتىمىزدىڭ تاريحىندا «زاڭ عىلىمدارىنىڭ دوكتورى» دارەجەسىن يەلەنگەن العاشقى قازاق دەسەم - ارتىق ايتقاندىق ەمەس. ول 46 جاسىندا قازاقستان رەسپۋبليكاسىنىڭ عىلىم اكادەمياسىنىڭ اكادەميگى اتاعىن يەلەنگەن. مۇنداي اتاققا يە بولۋ ونى عىلىمي ورتادا مويىندالۋ عانا ەمەس، جالپى قازاق جاستارىن عىلىمي باعىتقا، ونىڭ ىشىندە زاڭ عىلىمى ورتاسىنا الىپ كىرۋىنە ىقپال ەتتى. وسى باعىتتا ۇلتتىق عىلىمي ورتانى قالىپتاستىردى. اكادەميك ونەگەلى ومىرىندە 200 گە جۋىق عىلىمي ەڭبەك جازىپ، زاڭ عىلىمدارىنىڭ نەگىزىن قالاپ، وركەندەۋىنە سۇبەلى ۇلەس قوسقان»، - دەيدى ول.

ول سالىق زيمانوۆ قازاقتىڭ بيلەر سوتىنىڭ تەڭدەسى جوق ينستيتۋت ەكەنىن دالەلدەگەن عالىم ەكەنىن ايتتى.

«ول بيلەر سوتىنا ارنالعان ەڭبەكتەرىندە «قازاقتىڭ بي، قازىلارى ەشكىمگە تاۋەلدى بولماعان، ولاردى ەشكىم سايلاماعان، تورەلىك ايتاتىن ادامدى داۋلاسۋشىلاردىڭ وزدەرى تاڭداپ، ونىڭ ءادىل شەشىمىنە جۇگىنگەن. سوندىقتان بيلەر ءوز ابىروي- بەدەلى ءۇشىن ەشكىمگە قيانات جاساماي، شىدىقتىڭ جارشىسى بولعان» دەگەن بايلامدى تۇجىرىمدا قازاقتىڭ بيلەر سوتى ينستيتۋتىنىڭ بۇگىنگى سوت جۇيەسىنە ۇلگى ەتەرلىك تۇرتارى كوپ ەكەندىگىن ەسكەرتكەن. ەگەمەندى ەل بولىپ، تاۋەلسىز تاريحىمىزدى ەندى باستاعان شاعىمىزدا ول «قازاقستان ىشكى ۇيىمداستىرىلۋى بويىنشا كۇشتى مەملەكەتكە اينالۋى ءۇشىن ونداعان جىلدار قاجەت. ال پرەزيدەنتتىك بيلىكتى كۇشەيتۋ - كۇتتىرمەيتىن جاعداي» دەگەن. ونىڭ ويلارى ءوز ومىرشەڭدىگىن بۇگىن دالەلدەدى. سالىق زيمانوۆ ءوز ءومىرىن ەلىنىڭ دامۋىنا ارناعان ازامات. سالىق زيمان ۇلىنىڭ ءبىلىم جانە عىلىم سالاسىن باسقارۋ مەن دامىتۋعا قوسقان ۇلەسى مول. قازاق مەملەكەتتىك ۋنيەرسيتەتىنىڭ زاڭ فاكۋلتەتى، ۇلتتىق عىلىم اكادەمياسىنىڭ فيليسوفيا جانە قۇقىقتىق ينستيتۋتتارىن باسقارىپ، مىڭداعان شاكىرت تاربيەلەپ، وتىزدان اسا عىلىم دوكتورى مەن كانديداتىن دايىندادى. سالىق زيمان ۇلىنىڭ جەتەكشىلىگىمەن 1999 -جىلى كسرو مەن رەسەي فەدەراتسياسى ەۋروپا مەملەكەتتەرىنىڭ تاجىريبەسىن ەسكەرگەن ح ⅺعاسىر زاڭگەرىن دايىنداۋ ۇلگىسىن جاسادى»، - دەيدى ەرالى توعجانوۆ.

اۆتور: زارينا قاھارمان