پولشا مەن گەرمانيادا ۇزدىك دەپ تانىلعان قازاقستاندىق فيلم پروكاتقا شىقتى
«18 كيلوگەرتس» فيلمىنىڭ الەمدىك تۇساۋكەسەرى ۆارشاۆا حالىقارالىق كينوفەستيۆالىندە وتكەن بولاتىن. وندا كينوكارتينا باس جۇلدەنى جەڭىپ الدى . كەيىن فيلم كوتبۋستا (گەرمانيا) وتكەن 30-حالىقارالىق كينوفەستيۆالندە ۇزدىك دەپ تانىلدى.
فيلم زارا ەسەناماننىڭ «حاردكور» پوۆەسىنىڭ جەلىسى بويىنشا تۇسىرىلگەن. كارتينادا 90-جىلداردىڭ سوڭىنداعى جاس وسپىرىمدەردىڭ ءومىرى باياندالادى.
«اتالعان ءفيلمدى جارىققا شىعارۋعا ءۇش جىل كەتتى. بۇل وقيعانىڭ جالعاسى جوق. قازىر ءبىز وسى تاقىرىپتا تاعى ءبىر فيلم ءتۇسىرىپ جاتىرمىز. بۇل جولى قازىرگى زاماننىڭ قىزدارىن كورسەتەمىز. ءبىز جاسوسپىرىمدەر ءومىرىنىڭ نازاردان تىس قالاتىن تۇستارىن كورسەتەمىز»، - دەيدى رەجيسسەر فارحات ءشارىپوۆ.
فيلم ءتۇسىرىلىمى الماتىدا ءوتتى. باستى رولدەردى ۇلكەن كينودا العاش رەت دەبيۋت جاساعان جاس اكتەرلەر سومدادى، ولار - مۇساحان جۇماحان، الىبەك ادىكەن، كاميلا فۋن- سو.
«18 كيلوگەرتس - ەرەسەكتەر ەستىمەيتىن دىبىس جيىلىگى. فيلم جاس وسپىرىمدەردىڭ پروبلەمالارىنا ارنالعان. وسە كەلە جىل سايىن جاستاردىڭ پروبلەماسىن ءتۇسىنۋ كۇردەلەنەدى، ول ءوزىمىز ءجاس وسپىرىم كەزىمىزدە دە شەشىلمەيتىندەي كورىنەتىن. جول تابا الماي، شاراسىز قالعاندا سەزىلەتىن قورقىنىش كۇشىن ەسكە ءتۇسىرۋ قيىن. بۇل فيلم ارقىلى وسىنىڭ ءبارىن ەسكە سالعىم كەلدى»، - دەيدى ءشارىپوۆ.
ايتا كەتەيك، «18 كيلوگەرتس» فيلمى ازياداعى ەڭ ءىرى كينوفەستيۆالدە - پۋسان حالىقارالىق كينوفەستيۆالىنىڭ «ازيا كينوسىنا تەرەزە» اتتى كونكۋرستىق باعدارلاماسىندا دا كورسەتىلدى.
