زەينەتاقى جيناعىن پايدالانۋ: يپوتەكاسىز پاتەر الساڭىز قوسىمشا قۇجات تالاپ ەتىلەدى

نۇر-سۇلتان. قازاقپارات - زەينەتاقى جيناعىن پايدالانا وتىرىپ يپوتەكاسىز پاتەر الساڭىز قوسىمشا قۇجات تالاپ ەتىلەدى.

بۇل تۋرالى قازاقپارات وتباسى بانكىنىڭ باسپا ءسوز قىزمەتىنە سىلتەمە جاساپ حابارلايدى.

«ەگەر باسپانانى ءبىرىڭعاي زەينەتاقى جيناعى قاراجاتىن قولدانىپ + ءوزىڭىزدىڭ جەكە قولما-قول قاراجاتىڭىزدى قولدانىپ ساتىپ العان بولساڭىز enpf-otbasy.kz ونلاين-پلاتفورماسىندا راستاۋ قۇجاتتارىن (پ د ف- فورماتىندا) جۇكتەۋ كەزىندە ساتۋشى پاتەر قۇنىنىڭ ءبىر بولىگىن قولما - قول اقشامەن العانى تۋرالى قولحات بىرگە جۇكتەلۋى قاجەت»، - دەلىنگەن حابارلامادا.

سونىمەن قاتار، بانك زەينەتاقى قاراجاتىن ماقساتتى پايدالانۋشىلارعا مىناداي كەڭەستەر بەرەدى:

• ەگەر جەكە قاراجات بولىگى قولما-قول اقشاسىز، ياعني بانكتىك شوتىنا اۋدارىلعان بولسا، وندا راستاۋشى قۇجات رەتىندە اۋدارىلىم تۋرالى تۇبىرتەك جۇكتەلۋى ءتيىس.

• ەگەر ساتىپ الۋ - ساتۋ شارتى نوتاريۋستا راسىمدەلىپ، پاتەر قۇنىنىڭ ءبىر بولىگى نوتاريۋستىڭ كوزىنشە بەرىلىپ جانە بۇل تۋرالى ساتىپ الۋ - ساتۋ شارتىندا نوتاريۋس جازعان بولسا قوسىمشا قولحات پەن تۇبىرتەكتىڭ قاجەتى جوق.

ەسكە سالساق، 2- قاڭتاردا ق ر پرەزيدەنتى قاسىم-جومارت توقايەۆ زەينەتاقى جيناعىنىڭ ءبىر بولىگىن ماقساتتى پايدالانۋعا قاتىستى زاڭعا قول قويدى. قازاقستاندىقتاردىڭ زەينەتاقى جيناقتارىن پايدالانۋ ءۇشىن جاڭارتىلعان «جەتكىلىكتىلىك شەگى» جاريالاندى. زەينەتاقى جيناعىنان الۋعا بولاتىن سوما ب ج ز ق سايتىندا اۆتوماتتى تۇردە كورسەتىلەدى.

23- قاڭتاردان قازاقستاندا زەينەتاقىنىڭ ءبىر بولىگىن الۋعا ءوتىنىم قابىلداۋ باستالدى. ارنايى پورتالدا زەينەتاقىنىڭ ءبىر بولىگىن الۋعا ءوتىنىم قابىلداۋ باستالعالى ءۇش ساعاتتىڭ ىشىندە 4 مىڭنان استام ادام ءوتىنىش بەردى.